Ames pon a disposición da cidadanía dous meses ateigados de obradoiros TIC

O Concello de Ames informou hoxe dos detalles do programa de información informática da aula CeMIT local ao longo deses meses de novembro e decembro, un programa “repleto de actividades” que dará continuidade a certas liñas xa iniciadas previamente (o ciclo de Ofimática, poñendo o foco, desta volta, na creación de presentacións con LibreOffice Impress) e presentará novidades formativas nos seguintes eidos: móbiles, eAdministración, edición de imaxes ou compras seguras a través de Internet. Ademais en decembro tamén haberá un novo nivel no curso de informática para menores de idade.
Respecto dos cursos de LibreOffice Impress e de manexo básico de móbiles xa teñen as prazas cubertas pero, segundo informa o Concello, a cidadanía ten a posibilidade de apuntarse na listaxe de agarda.
Xa na segunda quincena do mes de novembro celebraranse as xornadas Crea o teu blog!, que se centra na plataforma Blogger e a importancia do caderno dixital como medio de comunicación básico que “nos ceiba da dependencia das redes sociais á hora de comunicarnos co noso público”. Para consultar días e horarios para esta e as seguintes actividades de novembro pódese visitar a ligazón específica habilitada pola aula CeMIT local.
Tamén se desenvolverán en novembro dous ciclos de empregabilidade. Crea o teu CV! e Busca de emprego a través de Internet, que se centrarán na mellora do proceso de busca de emprego mediante a creación dun currículo adaptado ás necesidades, así como no desenvolvemento de habilidades de busca de emprego a través da rede.
No último mes do ano, desenvolveranse xornadas de edición de imaxes co programa GIMP, para entender as súas bases e comezar a desenvolver técnicas de retoque e tratamento de imaxes. Amais, con motivo da proximidade das festas de Nadal, celebrarase un curso sobre como realizar compras seguras a través de Internet. Por outra banda, o martes 10, mércores 11 e xoves 12 brindarase á cidadanía do concello a posibilidade de afondar na Administración Electrónica (eAdministración), “rompendo as barreiras que existen para converternos en verdadeiros cidadáns dixitais”.
Durante o mes de decembro tamén dará comezo un curso de informática de nivel medio para os máis pequenos. Desta maneira os rapaces e rapazas afondarán no manexo do correo electrónico e ferramentas básicas para os estudantes coma Wikipedia, Calendario ou Google Drive. Será dende o 3 ao 19 de decembro.
O Concello tamén informa de que aula CeMIT ofrece a posibilidade de presenciar videoconferencias con distintos departamentos para “ofrecer charlas sobre temas relacionados coa tecnoloxía ou os dereitos do consumidor”. A do mes de novembro será o luns 4, de 12.00 a 13.00 horas, ofrecida pola Escola Galega de Consumo. Estará centrada no servizo técnico de asistencia que se ofrecen nos seguros de fogar e os propios de aparellos como caldeiras ou lavadoras.