Amigus organiza a comezos de agosto un campamento infantil de ciencia e tecnoloxía

A Asociación Informática Amigus organiza en colaboración co Concello de As Pontes e Servicio Móvil un campamento infantil de ciencia e tecnoloxía. Desenvolverase do 1 ao 5 de agosto no Lar de Endesa de As Pontes en horario de 9:00 a 14:00. Está dirixido a rapaces e rapazas de 6 a 14 anos, e ten un prezo de inscrición de 50 €.
No campamento de ciencia e tecnoloxía os rapaces realizarán obradoiros de robótica, programación, impresión 3D, reciclaxe, electrónica e ciencia na cociña. O formato será de talleres participativos, divertidos e innovadores adaptados para nenos das devanditas idades. “Coa realización destas actividades formativas, divulgativas e lúdicas”, informan dende Amigus, “búscase proporcionar á rapazada a unha base dun pensamento lóxico dedutivo, achegando iniciativas que espertan o seu interese pola ciencia e a investigación e favorecendo así o desenvolvemento da nosa sociedade”.
E engade a asociación: “Trátase de actividades interactivas onde se farán experimentos científicos axustados en contidos que todos os participantes poden levar a cabo. Coa realización destes experimentos foméntase o traballo en equipo, a elaboración de hipótese e a experimentación con materiais, para despois desenvolver pensamentos que boten á luz o que sucede e así reflexionar sobre os resultados”.