Ampla presenza tecnolóxica no I Encontro Con Empresas do Campus de Ferrol

martes, 4 de febreiro do 2025 S. P.

A Escola Politécnica de Enxeñaría de Ferrol (EPEF) reúne este venres 7 de febreiro, a partir das 9.30 horas, máis de 20 firmas de toda Galicia no seu I Encontro Con Empresas, unha iniciativa dirixida a todo o alumnado de grao e de mestrado deste centro da Universidade da Coruña (UDC). En palabras da organización, este encontro “preséntase como un espazo idóneo para coñecer cales son os perfís profesionais máis demandados polas empresas do sector, así como para ser entrevistado ou entrevistada e optar a unha bolsa de prácticas ou mesmo a unha vacante”.
O subdirector de Prácticas, Emprego e Mobilidade da Escola Politécnica de Enxeñaría de Ferrol (EPEF), Marco Campo, coordina este I Encontro Con Empresas no que participarán, con cadanseu stand, firmas tecnolóxicas como Tecdesoft, Accenture, Septentriotech ou Polygon-e, centrada no deseño de software.
Tamén estarán presentes Navantia, Ghenova, Qatro, Russula, Aluman, Acebron, Gabadi, Fridama, Monmega, Quest Global, FINSA, Grupo Intaf, Invall, San Juan Cimentaciones, Abance, COFRICO, Electro – Rayma, Techno Pro Hispania ou GT Artabria, entre outras.
A maiores, o programa da xornada inclúe dúas mesas redondas. Na primeira delas, titulada Retos para as Enxeñarías 2030 e prevista para as 9:45 horas, intervirán o responsábel de Transformación Dixital e Industrial de Navantia Ría de Ferrol, Rafael Morgade; o director da Oficina de Ferrol de Ghenova, Gabriel Baña; o director de Enxeñaría en Russula, Ángelo López; e o responsábel da Área de Desenvolvemento en Qatro, Juan Ferro. A segunda mesa levará por título Hai vida máis alá das grandes empresas e dará comezo ás 13:15 horas.