Android Auto podería integrar Gemini Live no futuro

O sistema que integra Android nos nosos vehículos, tras uns meses de actualizacións problemáticas, está a prepararse para un prometedor futuro, pois na última versión de proba de Android Auto detectaron trazas de novidades moi interesantes, como o avance nas melloras do control da radio FM directamente dende Android Auto, a incorporación de reprodución de ficheiros multimedia locais e, como prestación totalmente revolucionaria estaría a integración de Gemini Live.
No código da aplicación detectouse a posibilidade de iniciar unha conversa co asistente baseado en intelixencia artificial de Google, prestación que aínda tardaría en chegar (Gemini Live aínda é unha función limitada a subscritores de Gemini Advanced que teñan un móbil da familia Pixel 9), pero que suporía un cambio substancial no xeito de relacionarnos coa tecnoloxía no automóbil, xa que sería posible interactuar con Android Auto mediante conversas en linguaxe natural.
Tamén é curioso ver que a referencia figura no código como kitt_live, ou sexa, que internamente Google estaría a chamar kitt á tecnoloxía que permitiría que o vehículo estivese escoitando constantemente ao usuario para poder atender as súas ordes faladas. O rechamante deste nome é que a calquera persoa de carta idade resultaralle familiar, xa que coincide coas iniciais de Knight Industries Two Thousand, o vehículo tamén coñecido como O Coche Fantástico.