Android incrementa as posibilidades de Auracast

Hoxe preséntanse novas formas de escoitar e compartir audio entre dispositivos con LE Audio, a nova xeración de Bluetooth que ofrece unha calidade de son máis alta e novas funcións, como a posibilidade de emitir a varios dispositivos á vez.
A comezos deste ano anunciárase a compatibilidade de LE Audio Auracast cos audiófonos. Agora, Android expande estas capacidades tamén a auriculares de Sony. Ademais, os teléfonos Pixel compatibles pasan a contar con soporte LE Audio Auracast, sumándose así aos dispositivos Samsung Galaxy e Xiaomi. Isto permitirá que máis persoas poidan acceder ás emisións en lugares con Auracast, xa sexa para informarse nun aeroporto, seguir visitas audioguiadas nun museo ou escoitar canles de música ou televisión no ximnasio.
Coa integración de LE Audio Auracast en Android, compartir audio cun amigo é sinxelo: pódense emparellar dous auriculares Bluetooth LE Audio a un mesmo teléfono para escoitar á vez música, películas ou podcasts en sincronía. Tamén se pode compartir con grupos, iniciando unha transmisión desde o móbil para que outros se conecten escaneando un código QR ou cun toque a través de Google Fast Pair. Deste xeito, pódese invitar a unha persoa ou a un grupo enteiro a gozar do mesmo son, sen importar a aplicación ou servizo de subscrición empregado.
Así, se hai unha nova canción que che gusta, podes convidar a un amigo a escoitala nos seus propios auriculares sen ter que prestarlle un dos teus. E se estás cun grupo de colegas, é posible crear unha emisión privada e converter a reunión nunha discoteca silenciosa: cada quen conecta os seus auriculares e todos gozan da mesma música sen molestar ao resto.
Con esta aposta, Android achega LE Audio aos teléfonos e a dispositivos emparellados como audiófonos e auriculares, construíndo unha experiencia de son máis conectada e inclusiva.