Angry Birds: Star Wars chegará a consolas de videoxogos

xoves, 18 de xullo do 2013 Marcus Fernández

A nova versión do xogo chegará o 29 de outubro a EE.UU. e o 1 de novembro a Europa

O xogo Angry Birds: Star Wars leva dende novembro de 2012 dando guerra en numerosas plataformas, estando incluso nos últimos días a poder adquirirse de balde nas súas versións para iOS para celebrar o 5º aniversario da App Store e a anunciar que vai contar con secuela en setembro, polo que dende Rovio quixeron aproveitar este momento de grande actividade para desvelar que o 1 de novembro este título que cruza aos seus paxaros anoxados coa saga galáctica creada por George Lucas estará dispoñible para Xbox 360, PlayStation 3, Wii, Wii U e Nintendo 3DS.
O vicepresidente executivo de Rovio Entertainment, Jami Laes, asegura que “Angry Birds e Star Wars son dúas franquías con millóns de seguidores en todo o mundo, estamos encantados do noso acordo con Activision para facer posible a unión destas dúas recoñecidas franquías”.
A nova versión do xogo incluirá, aparte dos 22 escenarios do xogo para dispositivos móbiles, outros 20 niveis exclusivos, e tamén contará cun modo cooperativo para dous xogadores e un modo competitivo de ata 4 xogadores. Tampouco lle faltarán logros/trofeos e táboas de puntuación en liña.


Trailer de presentación da adaptación de Angry Birds: Star Wars a consolas

PUBLICIDADE