Animal Crossing estrea xogo móbil

martes, 21 de novembro do 2017 Marcus Fernández

Nintendo anunciou o mes pasado que antes de rematar o presente mes teriamos en iOS e Android o seu novo xogo móbil, Animal Crossing: Pocket Camp, e finalmente está aquí, podendo descargarse de balde da App Store e de Google Play, de xeito que as súas funcionalidades básicas estarán dispoñibles de balde, aínda que para desbloquear certos elementos poderemos empregar billetes folla que poderanse conseguir de balde ou pagarse con cartos reais, polo que compre revisar a configuración do smartphone ou tableta se os menores van gozar deste tipo de xogo se non queremos desagradables sorpresas.
O xogo convídanos a vivir a experiencia dunha acampada en plena natureza e en boa compaña, para o que teremos que xestionar unha parcela de acampada, na que colocar diferentes obxectos e na que poder convidar a outros campistas, converténdose nun animado punto de encontro.
En Animal Crossing: Pocket Camp pode personalizarse a nosa autocaravana, que serve tamén para visitar as parcelas dos amigos ou explorar áreas recreativas para coñecer a outros campistas aos que poder axudar facéndolle recados (como colleitar froita) para recibir compensacións a cambio (como materiais artesanais). Co material que se vai conseguindo poderanse crear obxectos e instalacións, para conseguir configurar a parcela dos nosos soños e compartila cos amigos que vaiamos facendo neste xogo móbil con coidados aspectos gráficos e sonoros que busca trunfar onde fracasou Super Mario Run ao adoptar un modelo de negocio pouco afortunado.

Tráiler de Animal Crossing: Pocket Camp

PUBLICIDADE