Anuncian o desenvolvemento de The Elder Scrolls Online

Imaxe de The Elder Scrolls V: Skyrim

Bethesda Softworks anunciou hoxe o desenvolvemento de The Elder Scrolls Online, un xogo de rol masivo en liña que será o primeiro da saga en permitir explorar este universo de fantasía en compañía. ZeniMax Online Studios está a elaborar este título para PC e Mac baixo a dirección de Matt Firor, profesional con grande experiencia na creación de xogos en liña.
En breve coñeceranse máis detalles deste xogo no número de xuño da revista Game Informer, que dedica a súa portada a este contido exclusivo que esperan con ansias os millóns de xogadores que están a gozar de The Elder Scrolls V: Skyrim, título recente que tivo moi boa acollida de crítica e público, considerándose por moitos medios como o xogo do ano en 2011. Con máis de 10 millóns de copias vendidas no primeiro mes, Skyrim conseguiu ser o segundo título máis vendido en 2011 e o xogo que máis rápido vendeu na historia da plataforma Steam.