Apple Arcade recibe 20 xogos novos

Aínda que o servizo de subscrición de xogos de Apple non conseguise a tracción que a compañía de Cupertino desexaría, está lonxe de estar abandonado, superando os 200 títulos aos que se incorporan outros 20 entre os que hai algún xogo destacable.
O xogo máis importante que chega a Apple Arcade é, sen dúbida, TMNT Splintered Fate, título protagonizado polas Tartarugas Mutantes que terán que cooperar enfrontándose a numerosos inimigos na procura do desaparecido mestre Acha. Estamos ante un xogo con mecánica de roguelike, o que resulta refrescante, xa que a meirande parte dos títulos inspirados nesta franquía optaban polo xénero dos beat’em up.
Como títulos relevantes tamén podemos salientar LIMBO+ (unha versión do cativador xogo de Playdead que convida a somerxernos en escenarios tenebrosos mentres resolvemos distintos quebracabezas) e Temple Run+ (outra revisión de todo un xogo de referencia no que hai que correr o máximo que se poida evitando obstáculos). Adicionalmente temos tamén os xogos Disney SpellStruck, What the cart?, Cityscapes: Sim Builder, Chess Universe+, Disney Coloring World+, Disney Getaway Blast+, Farming Simulator 20+, Getting Over It+, Hill Climb Racing+¸ Iron Marines+, Kingdom Two Crowns+, My Town Home – Family Games+, Octodad: Dadliest Catch+, PPKP+, Snake.io+, Time Locker+ e Very Little Nightmares+.
Lembremos que Apple Arcade é un servizo que ten un custo mensual de 4,99 euros, está destinado a dispositivos de Apple (móbiles, tabletas, ordenadores e incluso o Apple TV) e, como grande vantaxe, ten que os seus xogos están completos, ou sexa, que carece das microtransaccións que son actualmente tan habituais nos xogos e que poden chegar a viciar as mecánicas de xogo ao promover pagar para avanzar.