Apple TV+ por fin chega a Android

O servizo de vídeo baixo demanda de Apple, lanzado en 2019, foi ampliando paulatinamente os dispositivos dende os que podían reproducirse os seus contidos, chegando a aplicación de Apple TV a dispositivos con Google TV en 2021, pero sen abrirse a teléfonos e tabletas con Android, até hoxe, cando a aplicación para Android incorpora compatibilidade con dispositivos móbiles.
Agora, a aplicación permite gozar de Apple TV+ directamente dende o móbil ou a tableta, dun xeito óptimo, como calquera outra aplicación móbil de vídeo baixo demanda, rematando cunha sorprendente discriminación por parte de Apple, que permitía gozar sen problema dos contidos de Apple TV+ en televisores de distintas marcas, pero non en dispositivos móbiles que non fose iPhone ou iPad.
A aplicación tamén permite a descarga de contidos en local, para poder gozar dos mesmos en mobilidade sen ter que consumir datos ou ter problemas coa cobertura de Rede.