Apple adquire Pixelmator

Entre os usuarios de equipos e dispositivos de Apple goza de grande popularidade as aplicacións Photomator e Pixelmator Pro, editores fotográficos que, entre outras cousas, destacaban pola posibilidade de poder adquirirse como compra única, apartándose das subscricións de aplicacións como as de Adobe, e esta posición como referente parece ter desencadeado que a compañía de Cupertino se interesase pola empresa que realiza estes desenvolvementos e decidiu adquirila.
Así, Pixelmator anuncia que pechou un acordo para a súa adquisición por parte de Apple, que queda pendente da aprobación dos organismos reguladores, e que nun primeiro momento non terá impacto nas súas populares aplicacións, aínda que leva a pensar que rematarán desaparecendo para integrarse as súas funcionalidades dentro de macOS e/ou iOS/iPadOS, na liña ao que facían no pasado coa aplicación Aperture, abandonada por Apple hai 10 anos para frustración de moitos usuarios.