Apple descataloga o iPod classic

mércores, 10 de setembro do 2014 Marcus Fernández

Tras as grandes presentacións de Apple na xornada de onte, houbo un detalle que puido pasar desapercibido para moitos unha vez que se actualizou a páxina web do fabricante norteamericano, como foi a desaparición dun dos seus produtos emblemáticos da familia iPod: o iPod classic.
Non é ningún segredo que as vendas dos reprodutores multimedia portátiles caeron estrepitosamente coa emerxencia dos smartphones, de xeito que a familia iPod cada día tiña menos peso na carteira de produtos de Apple, dominada actualmente polo iPhone e o iPad, de aí que a desaparición dun produto que levaba anos sen actualizar como o iPod classic era só cuestión de tempo, e, a partires de agora, xa non se venderá oficialmente por parte de Apple, de xeito que só quedan unhas poucas unidades en circulación á venda por 269 euros no modelo de reprodutor cunha capacidade de 160 Gb.
Coa descatalogación do iPod classic a familia de reprodutores iPod limita a súa capacidade de almacenamento a un máximo de 64 Gb do iPod touch de maior capacidade, respondendo a unha tendencia de mercado, na que os servizos de música en streaming fan que a acumulación de álbums nun reprodutor careza de sentido, aínda que non sería de sorprender que moitos nostálxicos corran agora para facerse cun dos derradeiros iPod classic que queden en existencia para poder alongar a súa experiencia de uso o máximo posible.

JPEG - 39.3 KB
O iPod classic leva anos na carteira de produtos de Apple sen mellorar prestacións nin mudar de deseño

PUBLICIDADE