Apple negocia coa Comisión Europea o desbloqueo de Siri AI

O conselleiro delegado de Apple, Tim Cook, e a vicepresidenta executiva da Comisión Europea para a Soberanía Tecnolóxica, Seguridade e Democracia, Henna Virkkunen, mantiveron unha reunión virtual cualificada como «construtiva» por Bruxelas para tratar de reducir as tensións arredor da chegada da nova versión de Siri impulsada por intelixencia artificial ao mercado europeo.
O encontro centrouse en explorar fórmulas que permitan lanzar o renovado asistente na Unión Europea sen incumprir as obrigas da Lei de Mercados Dixitais (DMA), evitando así posibles sancións millonarias.
A nova versión de Siri constitúe unha das principais apostas de Apple para competir con asistentes conversacionais como ChatGPT ou Claude. O sistema incorpora capacidades de IA máis avanzadas e acceso á información persoal do usuario para ofrecer respostas e accións contextualizadas.
Apple sostén que os requisitos de interoperabilidade establecidos pola DMA impiden ofrecer esta funcionalidade en Europa. En concreto, considera problemático que a normativa obrigue a facilitar a asistentes de voz de terceiros un nivel de acceso comparable aos datos do dispositivo, algo que, segundo a empresa, comprometería tanto a experiencia de usuario como a seguridade.
Durante a presentación da nova Siri a comezos de xuño, o responsable de mercadotecnia mundial de Apple, Greg Joswiak, asegurou que a empresa fixo «un grande esforzo» para evitar esta situación e criticou que a Comisión Europea non aceptase as súas propostas nin mantivese un diálogo suficiente para atopar unha solución.
Desde Bruxelas, pola contra, consideran que Apple pretende obter unha excepción temporal ás súas obrigas legais. Fontes da Comisión sinalan que a empresa solicitou, na práctica, un período de 18 meses durante o cal podería ofrecer Siri mentres os competidores non dispoñerían das mesmas posibilidades de integración, unha situación que podería consolidar a posición do servizo antes de que existise competencia efectiva.
Como alternativa, Apple propuxo en novembro do ano pasado un sistema denominado Trusted System Agent, unha capa de software que actuaría como intermediaria entre os datos persoais almacenados no dispositivo e os modelos de IA de terceiros. O obxectivo sería permitir o acceso á información necesaria sen entregar acceso directo aos datos do usuario. Porén, ese mecanismo aínda non foi desenvolvido e Apple reclama garantías reguladoras antes de iniciar o seu deseño.
A Comisión Europea asegura que apenas recibiu información técnica concreta sobre esa proposta e afirma que Apple centrou as conversacións en obter autorización para atrasar o cumprimento da normativa máis que en presentar unha solución completa.
O enfrontamento provocou tamén unha intensa reacción pública. Segundo responsables comunitarios, a Comisión recibiu centos de correos electrónicos de cidadáns europeos que acusan Bruxelas de impedir o acceso ás novas funcións de intelixencia artificial. Un voceiro chegou incluso a recibir ameazas de morte.