Apple pagará 95 millóns de dólares aos afectados polas gravacións indiscretas de Siri

En 2019 desvelouse que había traballadores revisando gravacións de voz realizadas dende os iPhone entre as que figuraba numerosa información confidencial e íntima por mor dunha activación accidental de Siri. Este sistema correspondía a un sistema de control de calidade do asistente de voz, e segundo Apple correspondía a menos do 1% das activacións de Siri e as gravacións tiñan unha duración de poucos segundos.
Apple chegou a desculparse oficialmente, matizando que nunca empregan os datos de Siri para crear perfís de márketing nin os venden a terceiros, senón que aproveitan a información unicamente para mellorar a propia Siri. Tamén anunciaron a suspensión do programa de avaliación por parte de humanos, asegurando que menos do 0,2% das mostras de audio eran supervisadas por humanos para verificar o bo funcionamento de Siri.
Tras esta polémica, Apple mudou as súas políticas relativas a Siri, deixando de gardar gravacións de audio, permitindo que os usuarios poidan colaborar na mellora de Siri voluntariamente e, no caso de que o usuario acepte contribuír á mellora de Siri, os únicos humanos que revisarían as gravacións serían traballadores de Apple (e non de empresas externas).
Pero a reacción de Apple non impediu que se iniciase unha demanda colectiva nos EE.UU., que vén de concluír cun acordo a través do que os usuarios afectados polas gravacións de Siri recibirán até 20 dólares por persoa, o que suporía até 95 millóns de dólares. A compañía de Cupertino mantén que actuou ben en todo momento, pero optou por solucionar a demanda dun xeito rápido e discreto.