Apple prepara unha correa magnética para o iPhone e os AirPods Pro 3

De cara ao lanzamento dos novos teléfonos de Apple non cesan as filtracións non só sobre os novos modelos de iPhone, senón tamén sobre accesorios como as fundas tipo bumper (popularizados tras o Antennagate do iPhone 4) ou as fundas que collerán a remuda das de trenzado fino que (deixaron de comercializarse pola súa mala calidade), aos que agora se une a Crossbody Strap, unha correa de deseño minimalista que aposta por un sistema magnético inédito na compañía e que promete combinar comodidade e estilo.
Segundo informacións procedentes da cadea de produción, a Crossbody Strap xa estaría a fabricarse masivamente, e a súa principal innovación sería o seu mecanismo magnético: integraría un núcleo metálico flexible que a fai magnética en toda a súa lonxitude, mentres que nos extremos uns aneis con polaridade oposta reforzarían a suxeición. Este sistema permitiría acoplar ou retirar a correa das fundas do iPhone 17 sen necesidade de ganchos nin presillas, ofrecendo unha experiencia máis sinxela e práctica.
Os primeiros prototipos amósanse en nailon, suxerindo as filtracións que tamén podería existir unha variante en silicona, pensada para quen busque un acabado máis suave e flexible.
Aínda que estas correas estarían pensadas para o iPhone, o accesorio tamén podería ter compatibilidade cos AirPods Pro 3, ampliando así as opcións de uso dentro do ecosistema Apple. A compañía ofrecería, ademais, varias cores e estilos para que cada usuario poida personalizar a súa experiencia.