Apple podería integrar a IA de Google no vindeiro iPhone

luns, 18 de marzo do 2024 Marcus Fernández

A primeiros de ano Samsung revolucionou o mercado co lanzamento dos novos Galaxy S24 integrando intelixencia artificial, nunha combinación de funcións de IA que corren en local (como a tradución de texto e voz) con outras que corren en liña (como as buscas na web e a edición fotográfica), e agora dende Bloomberg insinúan que Apple podería seguir o mesmo camiño co iPhone 16, pois estaría en negociacións con Google para integración de Gemini nos seus dispositivos.
Actualmente as compañías estarían en negociacións activas, que non terían por que concretarse (pois aseguran que tamén están conversando con OpenAI para empregar os seus modelos de IA), aínda que o acordo con Google podería ser relativamente doado, xa que podería incorporarse dentro da alianza que ambas compañías teñen de cara ás buscas na web (Google paga a Apple milleiros de millóns de dólares ao ano para que Google sexa o buscador web predeterminado nos seus produtos).
Cómpre salientar que o actual acordo entre Google e Apple está baixo a lupa dos reguladores en varios territorios, que consideran que pode ser unha práctica que atenta á competencia. Non parece que iso vaia ser un obstáculo para as negociacións actuais, sendo bastante probable que Apple, pese a estar a desenvolver un modelo de IA propio, opte por integrar este tipo de tecnoloxía en iOS da man dalgún socio para estrearse dignamente, e non cun produto con moitos meses por diante para pórse á altura da competencia.

PUBLICIDADE