Apple presenta novas ferramentas para desenvolvedores

Apple anunciou hoxe importantes novidades para os desenvolvedores que traballan co seu ecosistema, entre as que destacan a integración de modelos de linguaxe como ChatGPT en Xcode 26, acceso ao seu modelo Apple Intelligence en dispositivos, e un deseño unificado e elegante en todas as plataformas. Estas innovacións, dispoñibles desde hoxe para os membros do Apple Developer Program, buscan facilitar a creación de aplicacións máis modernas, intuitivas e visuais en iOS 26, iPadOS 26, macOS Tahoe 26, watchOS 26 e tvOS 26.
Estas melloras están pensadas para ofrecer aos creadores as ferramentas necesarias para desenvolver aplicacións máis ricas e contextuais, mantendo o enfoque na privacidade e a eficiencia. A nova estética das plataformas baséase na nova linguaxe de deseño bautizada como Liquid Glass, que achega fluidez e refinamento á interface de usuario, desde botóns e controis ata barras laterais ou iconas, agora deseñables cunha nova ferramenta chamada Icon Composer.
Outro dos piares da actualización é o Foundation Models Framework, que permite empregar capacidades de IA de xeito local e sen custo adicional, con soporte para Swift. Aplicacións como Day One ou Etsy xa comezaron a integralo para ofrecer experiencias máis intelixentes e visuais sen comprometer a privacidade do usuario.
Xcode 26 incorpora suxestións contextuais, navegación redeseñada, melloras na ditado por voz e integración directa con ChatGPT e outros modelos, sen necesidade de conta. Pola súa banda, Swift 6.2 introduce novidades que melloran o rendemento e facilitan o uso de concorrencia, ao tempo que incorpora compatibilidade con WebAssembly.
O entorno para videoxogos tamén se reforza. A terceira versión do Game Porting Toolkit, xunto co novo motor gráfico Metal 4 e funcionalidades como MetalFX Frame Interpolation e MetalFX Denoising, permiten renderizar efectos visuais máis realistas. Tamén se presenta a aplicación Apple Games, que centraliza a actividade lúdica dos usuarios e integra funcionalidades sociais a través de Game Overlay e desafíos multixogador.
No ámbito da seguridade infantil, destaca a nova API Declared Age Range, que permite adaptar contidos sen expor datos sensibles, e melloras no control paterno. Ademais, os desenvolvedores poderán especificar nas fichas da App Store as funcionalidades de accesibilidade das súas aplicacións mediante as novas Etiquetas de Nutrición de Accesibilidade.
Todas estas novidades xa se poden probar a través do Apple Developer Program e estarán dispoñibles en versión beta pública o mes que vén. A compatibilidade inicial está limitada a dispositivos con chip A17 Pro ou M1 e posteriores, e o uso da Apple Intelligence require que Siri e o idioma do dispositivo estean configurados nunha das linguas soportadas (como inglés, español ou portugués do Brasil), ás que se sumarán outras ao longo do ano.