Apple renova os seus iPad máis básicos

martes, 14 de setembro do 2021 Marcus Fernández

A presentación dos novos iPhone chegou precedida pola posta ao día dun par de tabletas e dos reloxos de Apple, resultando especialmente satisfactoria a renovación dos iPad básicos, con pantalla de 10,2 polgadas, que reciben un procesador A13 Bionic, a función de Encadre Centrado para a cámara ultra grande angular de 12 Mpíxeles, True Tone e incluso dobran a súa capacidade de almacenamento, mantendo o prezo máis económico da súa familia de produtos (que parte de 379 euros para o modelo con 64 GB de almacenamento e conectividade Wi-Fi, chegando até 689 euros con 256 GB de capacidade e conectividade móbil 4G).
Este novo iPad mantén o seu deseño tradicional e chegará ao mercado o 24 de setembro, mentres que o iPad mini si experimentou cambios máis profundos, xa que recibiu un deseño que aposta pola redución de marcos ao redor da súa pantalla de 8,3 polgadas, conta tamén coa función de Encadre Centrado na súa cámara frontal de 12 Mpíxeles, incorpora porto USB-C (o que, entre outras cousas, fai que poida funcionar co Apple Pencil 2, que pode adherirse magneticamente a un lateral), integra Touch ID no botón superior e dá un importante salto en conectividade, incorporando Wi-Fi 6 e 5G.
Temos aquí un dispositivo realmente avanzado, que non debe enganar polo seu tamaño, xa que o formato compacto non quere dicir que sexa un produto menor, senón que está adaptado para usos nos que a portabilidade é moi importante. Podemos entender así que sexa un dispositivo bastante máis caro que o iPad básico, partindo dun prezo de 549 euros para o modelo con 64 GB de almacenamento e conectividade Wi-Fi e chegando aos 889 euros con 256 GB de almacenamento e 5G. Estará dispoñible a partir do vindeiro día 24.

JPEG - 118.7 KB
O iPad básico mantén o seu deseño tradicional, pero actualízase para que a porta de entrada ás tabletas de Apple sexa o máis digna posible.

O novo iPad mini supón todo un salto en deseño, potencia e conectividade

PUBLICIDADE