Apple responde ás polémicas rabuñaduras que presentan os novos iPhone 17 Pro

A estrea do iPhone 17 Pro vén marcada por unha nova polémica: o chamado scratchgate. A cuestión saltou á luz pública o día do lanzamento, cando Bloomberg deu conta de publicacións en redes sociais que alertaban de que varias unidades de demostración do modelo Pro, especialmente na cor azul escura, amosaban marcas visibles tras poucas horas de exposición en tendas de Nova York, Hong Kong ou Londres. As redes sociais amplificaron a preocupación, con imaxes e vídeos que mostraban rabuñaduras arredor do módulo de cámara e na parte traseira, especialmente na zona do MagSafe.
A explicación técnica chegou días despois da man de iFixit, que realizou unha análise microscópica do dispositivo. Segundo os seus expertos, o problema radica na capa de anodizado aplicada ao novo corpo de aluminio, que substitúe ao titanio usado na xeración anterior. Esta capa, aínda que resistente en superficies planas, resulta fráxil en esquinas agudas como as do módulo de cámara, onde se produce un fenómeno chamado spalling: a fractura da capa superficial que deixa á vista o aluminio brillante. O enxeñeiro David Niebuhr, consultado por iFixit, sinala que este tipo de dano podería terse evitado cun deseño de curvas máis suaves, en lugar de bordes pronunciados.
Apple, pola súa parte, respondeu ás críticas a través de declaracións recollidas por 9to5Mac. A compañía atribúe parte das marcas observadas nas tendas a un fenómeno de transferencia de material desde soportes MagSafe desgastados, e asegura que non se trata de rabuñaduras permanentes senón de residuos que poden eliminarse cunha limpeza adecuada. En canto ás marcas no módulo de cámara, Apple defende que os bordes do aluminio anodizado teñen características similares ás doutros produtos da marca e que, malia pasar probas de durabilidade, poden sufrir desgaste normal co uso.
Aínda que o iPhone 17 Pro mantén unha boa puntuación en reparabilidade e introduce avances como unha batería aparafusada e unha cámara de vapor para mellorar a disipación térmica, a polémica sobre a súa resistencia física pon en dúbida a decisión de abandonar o titanio. Mentres Apple traballa para substituír os soportes defectuosos nas tendas, o debate sobre a durabilidade real do novo deseño continúa aberto entre usuarios e expertos.