Apple terá que pagar 634 millóns de dólares a Masimo pola función de medición de osíxeno en sangue dos seus reloxos

Un xurado federal en Santa Ana, California, ditou un veredicto que podería marcar un precedente na relación entre dispositivos de consumo e tecnoloxía médica. Masimo Corp. obtivo unha compensación de 634 millóns de dólares tras convencer ao tribunal de que Apple infrinxiu as súas patentes de oximetría de pulso ao integrar esta funcionalidade en modelos de Apple Watch vendidos entre 2020 e 2022.
O caso xirou arredor dunha cuestión clave: se un reloxo intelixente pode ser considerado legalmente un monitor de pacientes. Os avogados de Apple defenderon que este termo só se aplica a dispositivos clínicos deseñados para unha vixilancia continua, argumentando que o Apple Watch non cumpre esa definición. «A característica esencial de todos os monitores de pacientes é que non poden perder eventos médicos importantes», afirmou Joseph J. Mueller, letrado de WilmerHale. Pola súa parte, Masimo insistiu en que Apple describiu internamente o seu reloxo como «o monitor de frecuencia cardíaca máis usado do mundo», e que a súa sensibilidade do 95 % na detección de pulsacións elevadas en repouso encaixa cos requisitos da patente.
Este litixio forma parte dunha longa batalla xudicial entre ambas compañías. En 2023, outro proceso paralelo por suposta apropiación de segredos comerciais rematou en xuízo nulo, o que obrigará a repetir o xuízo. Ademais, a Comisión Internacional de Comercio dos Estados Unidos decretou unha prohibición de importación de certos modelos de Apple Watch tras concluír que Apple tamén infrinxira patentes de Masimo.
Apple xa anunciou que recorrerá a decisión. Nun comunicado, a compañía sinalou: «Estamos en desacordo coa decisión de hoxe, que cremos contraria aos feitos. Masimo é unha empresa de dispositivos médicos que non vende produtos a consumidores. Nos últimos seis anos demandaron a Apple en múltiples tribunais e presentaron máis de 25 patentes, a maioría das cales foron declaradas inválidas. A única patente neste caso expirou en 2022 e refírese a tecnoloxía histórica de monitorización de pacientes de hai décadas».
Cómpre salientar que a medición do osíxeno en sangue nos Apple Watch segue a funcionar con normalidade na Unión Europea, mentres que nos EE.UU. levan un par de anos sen poder gozar de tal función por mor do conflito entre Apple e Masimo.