Arranca en Lugo, en formato online, a sexta edición do Inicia Coworking

Comezou en Lugo a sexta edición do programa Inicia Coworking, que, como o seu nome indica, vai dirixido a facilitar os instrumentos formativos necesarios a quen queira comezar unha andaina profesional e empresarial alternativa: colaborando con outras persoas emprendedoras e nun ambiente cun marcado compoñente innovador e tecnolóxico. A alcaldesa Lara Méndez deu esta semana a benvida aos participantes da iniciativa, na que obteñen capacitación e asesoramento 26 persoas.
A rexedora participou este martes na inauguración online da sexta edición do programa Inicia Coworking, promovido polo Concello coa colaboración da EOI (Escola de Organización Industrial) e co-financiado polo Fondo Social Europeo. A alcaldesa estivo acompañada da directora xeral da EOI, Nieves Olivera.
A través desta iniciativa, ofrécese ás e aos participantes, de xeito individualizado e totalmente gratuíto, formación e acompañamento para a posta en marcha ou consolidación de novos proxectos de carácter emprendedor e innovador.
Por segunda edición consecutiva, e con motivo da pandemia, esta realizarase de forma online, a través da plataforma da EOI Blackboart Collaborate, seguindo o modelo de ensinanza e-learning.
Lara Méndez subliñou que “este programa constitúe unha ferramenta moi útil para innovar e desenvolver un proxecto exitoso nun momento de especial dificultade pola crise que nos tocou vivir. Neste senso, estamos moi satisfeitos de ter apadriñado aos primeiros emprendedores de Lugo nacidos en pleno confinamento, a través da quinta edición do coworking celebrada o pasado ano”. Así, animou ás persoas seleccionadas este ano a “aproveitar esta oportunidade”, e lembrou que da última edición, 15 participantes conseguiron poñer en marcha os seus negocios, e atópanse facturando actualmente, o que supuxo o 70% das inscruicións. Trátase de novas empresas no campo do turismo, a enxeñaría, a hostalería, a arte, a sustentabilidade e a innovación, entre outros.
Entre os negocios a desenvolver este ano, boa parte deles impulsados por mulleres, a maioría están relacionados co sector terciario (moda, fotografía, gastronomía, cultura...) e coas novas tecnoloxías (ecommerce, marketing dixital, desenvolvemento web, ciberseguridade...).