Arranca o primeiro programa acelerador de Conector Galicia con 5 firmas innovadoras
martes, 18 de xullo do 2017
- Lalo García, director de Conector Galicia, durante a presentación da súa alianza con ABANCA
Conector Galicia, a nova
aceleradora de firmas innovadoras galegas en fase “semente”, vén
de pór en marcha o seu primeiro programa de pulo a proxectos
tecnolóxicos e de Internet na nosa terra. E faino arrincando con
cinco start-ups. Estes novos proxectos, a partir de agora,
estarán cinco meses adestrándose e recibindo formación e
asesoramento especializado para logo culminar o seu proceso de medre
coa celebración dunha gran xornada de demostración, unha Demo
Day que será, tamén, un foro de investimento privado en
Galicia.
A aceleradora Conector
Galicia, como lembraremos, foi
impulsada en 2016 por algúns dos principais expertos en innovación
empresarial da nosa terra, como por exemplo Rubén Ferreiro,
director executivo de Viko, Eduardo Aldao, director de Innovación de
ABANCA, ou Lalo García, fundador de Lancetalent,
Knowledge Investors, Xebook;
e colaborador de Redinvest CFV, ViaGalicia e Laconnetwork. Lalo
García, por certo, é o director de Conector Galicia.
Volvendo ás cinco firmas
innovadoras seleccionadas, foron elixidas de entre máis de 30
candidaturas, logo dun exhaustivo proceso de selección por parte dos
socios e mentores de Conector Galicia que, a través dos seus votos,
elixiron as mellores start-ups para o primeiro programa. Os
proxectos seleccionados son: Aensis
(plataforma que proporciona sistemas de ciberseguridade con
visibilidade total da Rede, protección de espectro completo e
seguridade proactiva fronte ameazas actuais e vindeiras), La
Sal Style (firma centrada na moda e nas coleccións de roupa
urbana casual, con edicións limitadas de prendas exclusivas), Mireiq
(empresa que permite aos usuarios experimentar a fondo co mundo dos
bolsos e e conformar con oito pezas intercambiábeis máis de 20
modelos diferentes, “levando a ultra personalización á moda”),
Siccae Ventures (firma
innovadora de moda e tendencias, moi centrada nas novas canles de
creación e distribución arredor dos brazaletes de deseño) e
Wannachek (un servizo
centrado en achegar total seguridade nas transaccións que fan os
usuarios na compravenda de vehículos).
Estes cinco proxectos
contarán, durante os vindeiros cinco meses, cos seguintes
beneficios: soporte e asesoramento diario do equipo de Conector
Galicia; bonificacións (perks) valoradas en máis 400.000
euros e servizos profesionais valorados en 10.000; charlas de
formación da man dos mentores da aceleradora; oficinas de balde;
visibilidade no ecosistema emprendedor estatal; e acceso á rede de
investidores e networking.
Ademais, cada proxecto
formará o seu board de mentores, un consello de expertos que
lles acompañará durante todo o programa e asesoraralles na súa
estratexia de crecemento e vendas, mediante reunións periódicas
individuais e en grupo.