Arredor de 30 escolares participan mañá no Scratch Day do CPETIG
venres, 19 de outubro do 2018
Este
sábado, 20 de outubro, celébrase na Cidade da Cultura a cuarta
edición da xornada que o Colexio Profesional de Enxeñaría Técnica
en Informática de Galicia (CPETIG) adica anualmente a divulgar as
posibilidades creativas e de desenvolvemento que nos abren as novas
tecnoloxías (robótica, informática, programación) dende a nenez.
Falarmos
do IV Scratch Day, organizado polo CPETIG coa colaboración da
axencia AMTEGA e dirixido a escolares de entre 7 e 15 anos na compaña
das súas nais e pais. Na xeira de mañá, a rapazada aprenderá
a programación dun videoxogo no ordenador. Participarán arredor de
30 escolares.
Máis
en detalle, o IV Scratch Day terá como finalidade “difundir os
valores da programación informática entre os nenos e as súas
familias”, de xeito que os participantes poden acceder ao mundo da
programación “de maneira lúdica e divertida”, tomando
conciencia da potencia desta ferramenta como medio de expresión de
ideas e vehículo para o emprendemento.
Asemade,
o CPETIG pretende que esta iniciativa contribúa “a eliminar mitos
en relación á programación informática” e a “superar desde a
nenez os estereotipos de xénero sobre este área do coñecemento”,
difundindo as posibilidades que ofrecen as TIC e reducindo a fenda
dixital.
O
CPETIG concibe esta formación no contexto da familia por considerar
“decisiva” a implicación dos pais e as nais neste ámbito, “como
apoio e motivación para que os seus fillos se sintan atraídos cara
á programación informática, de xeito que esta actividade non sexa
unha excepción, senón o principio dun labor a seguir no fogar”.
A
sesión, como dixemos, estará adicada á programación de
videoxogos, sendo preciso que os asistentes leven o seu portátil, xa
que non serven tabletas ou smartphones.
A
formación do Scratch Day será impartida pola Asociación
Programamos, dedicada a promover o desenvolvemento do pensamento
computacional en todas as etapas escolares, a través da programación
de videoxogos e aplicacións para móbiles.