Arredor de setenta persoas acudiron á apertura de Impact Hub Vigo
luns, 15 de maio do 2017
Galicia
xa ten presenza física de seu na rede Impact
Hub, o ecosistema de innovación social con presenza en máis de
85 cidades do mundo (e contando coa participación de 15.000
impulsores de startups). Estamos
a falar da apertura do Impact Hub Vigo, cuxa
sede de seu (na rúa Policarpo Sanz) inaugurouse oficialmente o
pasado 10 de maio logo
de dous anos xa de actividade.
A cita contou coa presenza
dunhas 70 persoas e, amais de dar a coñecer as instalacións e os
obxectivos, aproveitouse para mostrar en detalle a páxina web,
vigo.impacthub.net, un
coidado espazo en liña con feitura de comunidade dixital e canle de
comunicación e que se presenta, tamén, na nosa lingua (amais de en castelán e en inglés).
Volvendo
ás dependencias estreadas,
sinalar que estas e todas
as súas equipas de
innovadoras/es emprendedoras/es estarán integradas
nunha rede internacional que,
en boa maneira, funciona como gran
referente da innovación
solidaria
das PEME e startups (PEME
e startups que fan
tecnoloxía e riqueza á par que contribúen a un mundo mellor).
Os diferentes espazos mundiais integrantes de Impact Hub teñen
múltiples ligazóns comunicativas e redes de traballo físicas e
virtuais (contan cunha rede
social propia, Hub Net, e un pasaporte propio, o Impact Hub Passport,
que permite traballar en calquera impact hub
de calquera cidade).
- Captura da páxina web de Impact Hub Vigo
Os
impulsores desta iniciativa viguesa recoñeceron na apertura das
dependencias que dende estas preténdese achegar un espazo onde
compartir coñecementos e experiencias ao tempo que xorden alianzas
para fortalecer os proxectos. A un nivel máis concreto,
poranse en marcha eventos e obradoiros de diversas temáticas, aínda
que boa parte deles co nexo común da innovación social.
Á
inauguración asistiron unhas setenta persoas, entre os que se
atopaban emprendedores, representantes de institucións públicas
(como Jaime Aneiros, concelleiro de economía do Concello de Vigo),
representantes da Xunta de Galicia, de empresas da cidade e de
diversas organizacións sociais e culturais.