Arrinca a quinta edición do programa de inmersión lingüística 21 días co galego e +
martes, 24 de xaneiro do 2023
Volve
o programa de inmersión no galego concibido no IES da Pobra do
Caramiñal, da man da profesora Pilar Ponte, a través do cal
convídase ao alumnado de secundaria a vivir preto de tres semanas
vivindo, pensando, comunicándose e creando en galego. Estamos a
falar do programa 21 días co galego e+, impulsado pola
Secretaría Xeral de Política Lingüística e cuxa proposta orixinal
(agora amplificada a máis centro polo dito departamento da
Consellería de Educación e Cultura) ten o seu xermolo no IES da
Pobra. A nova edición (a quinta) foi presentada este martes 24 de
xaneiro. Participaron
o secretario xeral de Política Lingüística, Valentín García, e o
director xeral de Centros e Recursos Humanos, Jesús Álvarez. A
cita foi no IES Rafael Dieste da Coruña, participante na iniciativa.
Tamén interviñeron o presidente da Real Academia Galega, Víctor F.
Freixanes; o director do dito instituto, Mateo Torres, e a profesora
e creadora da iniciativa, Pilar Ponte.
Segundo
fixeron saber, esta nova edición desenvolverase en 12 centros
galegos entre o 24 de xaneiro e o 13 de febreiro. Participarán 4.564
persoas entre alumnado, profesorado e persoal de administración e
servizos, “unha cifra que supera nun 20% a do ano pasado e que
supón, ademais, a máxima participación nos cinco anos de
traxectoria que suma esta iniciativa de dinamización lingüística”,
sinalaron.
Por
certo que ao acto de apertura de hoxe na Coruña iranse sumando, nos
días vindeiros, cadansúas inauguracións nos 11 centros adscritos
restantes.
Baixo
o lema Falando para un mundo mellor, co que se busca “motivar
á rapazada a medrar no uso do galego”, o alumnado do último ciclo
de Primaria, ESO, Bacharelato e FP intensificará voluntariamente a
súa expresión en galego durante os 21 días que funciona o
programa. Disto quedará constancia no blog 21diascogalegoemais.gal,
o soporte central da iniciativa, no que se mostrarán as creacións
dos centros participantes, así como tamén nas contas de Facebook,
TikTok, Instagram e Twitter.
No
acto de inauguración tamén se fixo saber que 21 días co galego
e + manterá a colaboración externa co programa Galicia por
diante, da Radio Galega, onde terá unha sección diaria de luns
a venres durante estas tres semanas; e co programa Dígocho eu!,
da CRTVG, que terá encontros co alumnado dos 12 centros educativos.
Como
novidade, este ano celebrarase o I Encontro 21 Días co Galego e
+, que reunirá o alumnado de todos os centros participantes o
vindeiro 28 de febreiro no Gaiás para compartir moita lingua a
través das súas experiencias no programa.
Centros
participantes
Os
centros participantes varían cada ano e, por segundo ano
consecutivo, son 12. Neste curso 2022/23 o programa desenvolverase no
IES Plurilingüe Rafael Dieste (A Coruña), IES de Melide (Melide),
CPI Plurilingüe Virxe da Cela (Monfero) e CPR Divino Maestro
(Santiago), todos eles na provincia da Coruña; no CPR Plurilingüe
Sagrado Corazón de Xesús (Ribadeo) e IES María Sarmiento
(Viveiro), na provincia de Lugo; no IES Nº1 do Carballiño (O
Carballiño) e CPI Virxe dos Remedios (Castro Caldelas), en Ourense;
e no CPI Plurilingüe Alfonso VII (Caldas de Reis), CPI Plurilingüe
Arquitecto Palacios (Nigrán), IES Aquis Celenis (Caldas de Reis) e
IES A Basella (Vilanova de Arousa), na provincia de Pontevedra.
Na
inauguración explicouse tamén que “esta iniciativa de
dinamización lingüística naceu para estimular o uso do galego no
alumnado e perfeccionalo dentro e fóra das aulas”. Como dixemos,
ten a súa orixe na experiencia posta en macha en 2013 no IES da
Pobra do Caramiñal, da man da profesora Pilar Ponte, e que mesmo
chegou a recibir en 2015 un premio de innovación en dinamización
lingüística, en 2016 un recoñecemento da Real Academia Galega e no
2019 o Premio da Cultura Galega na categoría de Lingua. Desde o ano
2019 foi asumido pola Secretaría Xeral de Política Lingüística,
que inicialmente o desenvolveu en catro centros educativos, un por
cada unha das provincias galegas.