Arrincan as reunións para implantar en Santiago a eAdministración
mércores, 20 de xuño do 2018
Onte
comezaron
oficialmente as xuntanzas internas para a implantación en Santiago
do proxecto actual de Administración Electrónica, unha
iniciativa de renovación tecnolóxica que conta cun orzamento de 1,8
millóns de euros e que afectará a todas as frontes e ámbitos da
administración local e da súa relación coa cidadanía. A
constitución e posta en marcha da nova plataforma dixital será, en
palabras do Consistorio, o proxecto de mellora da xestión municipal
máis relevante da historia recente do Concello.
As
xuntanzas que comezaron onte tiveron un precedente a semana pasada,
coa primeira reunión de coordinación presidida polo concelleiro de
Medio Ambiente, Xan Duro. Nas sesións lembrouse que o obxectivo é
“acadar a modernización global da xestión municipal”.
O
prazo para dar rematada a iniciativa de Administración Electrónica
é de dous anos. Entre outras cousas, quérese botar man das máis
avanzadas tecnoloxías para “facilitarlle á veciñanza a súa
relación coa administración e permitirlle realizar a maioría dos
trámites desde as súas casas, de maneira telemática”. Para isto,
habilitarase unha plataforma de eAdministración con sede e rexistro
electrónicos e un novo xestor de expedientes. Asemade, informaron os
responsábeis do Concello, “permitirase modernizar a xestión
tributaria e de tesourería ou a xestión do padrón de habitantes”.