Artesanía de Galicia leva a formación dixital ás nosas redeiras

A Fundación Artesanía de Galicia, en colaboración coa Consellería do Mar, organiza un curso de formación especializada dirixido ás redeiras artesás galegas, no marco do proxecto Enredadas, no que ambos os dous departamentos colaboran dende o ano 2012. A iniciativa porá o foco, especialmente, no ámbito tecnolóxico, equipando ao dito colectivo profesional de recursos e habilitades para tirar o máximo proveito das novas canles dixitais.
O curso Xestión básica da actividade comercial. Análise de produción e prezos de venda está deseñado co obxectivo de servir de ferramenta para que as redeiras poidan desenvolver precisamente esa parte da súa actividade que está enfocada noutros ámbitos como a moda, os complementos ou a decoración. O prazo de inscrición está aberto na páxina web da Fundación.
O curso celebrarase do 26 de outubro ao 25 de novembro, en horario de 18:00 a 21:00 horas, e será impartido polos consultores Pablo López, Tania Aira e Adriana Hermida, da empresa Implicatum.
Ao longo desta actividade trataranse temas como a marca persoal, a xestión de redes sociais e a mercadotecnia dixital, a xestión de compras e de provedores, a xestión da calidade, as estratexias de distribucións e canles de venda, as políticas comerciais ou a estratexia de prezos, a xestión financeira e o deseño dun plan de acción.
Este é o segundo dos tres cursos de formación para redeiras incluídos no proxecto para este ano 2020. O primeiro deles, Deseño e aplicación das técnicas das redeiras ao sector da moda e complementos, comeza en Buño esta fin de semana e está programado xa o curso Iniciación á aplicación das técnicas das redeiras ao sector da decoración, entre os meses de novembro e decembro.
Nesta última parte do ano, a Fundación Artesanía de Galicia está a introducir a modalidade online na súa proposta formativa, ademais de potenciar os contidos relacionados coa presenza dixital e a difusión e a comercialización online, co obxectivo de “apoiar o sector artesán galego na apertura de novas vías para achegar o seu produto aos clientes e afianzar as súas marcas”.