As TIC foron os grandes protagonistas do Startup Day da 8ª edición de ViaGalicia

O Startup Day de VíaGalicia, a aceleradora de Zona Franca e o IGAPE, reuniu este mércores 19 de marzo, no Porto do Molle (Nigrán), un centenar de participantes de 36 propostas empresariais que gozaron dun día de dinámicas de grupo para avaliar as súas competencias como promotores. O seu obxectivo: conseguir entrar entre os 23 proxectos elixidos, que nos vindeiros días daranse a coñecer, para pasar á seguinte fase de preaceleración da Academia. Asistiron o delegado do Estado da Zona Franca, David Regades, a directora de IGAPE, Covadonga Toca, e o alcalde de Nigrán, Juan González.
Mentres na primeira fase valoráranse as ideas e o contido dos proxectos, no Startup Day deste 19 de marzo valorouse aos promotores e os seus equipos.
Mediante dinámicas de grupo avaliáronse competencias como o liderado, a comunicación, a capacidade de negociación ou a creatividade. Tamén, o grao de complementariedade e o carácter multidisciplinar, así como a experiencia profesional e emprendedora previa, especialmente no ámbito sectorial de aplicación.
David Regades, que desexou sorte e éxito aos proxectos deste ano, destacou “o excelente balance de 7 edicións de ViaGalicia, que se consolidou como unha das aceleradoras máis destacadas de toda España”. O delegado do Estado na Zona Franca puxo en valor “datos que falan por si sós: analizáronse máis de 1.500 iniciativas empresariais e axudamos na definición do modelo de negocio a máis de 200 proxectos. O resultado son 57 startups que superaron no último ano os 45 millóns de euros de facturación e pecharon roldas de financiamento por valor de 70 millóns de euros, creando máis de 500 empregos de alta cualificación. Son números extraordinarios”.
Das 36 propostas analizadas, destacaron as relacionadas coas TIC, máis dun 22%: aplicacións, servizos de software ou organización de procesos. Tamén os proxectos do sector da agroalimentación e a pesca (17%), e turismo e hostalería (11%). Só estes tres sectores representaron un 50% do total; no 50% restante foron iniciativas vinculadas a servizos a empresas e enerxía e recursos naturais cun 8% do total cada un. En resumo, na tipoloxía de proxectos, as tendencias predominantes foron as novas tecnoloxías, especialmente no eido da Intelixencia Artificial, aínda que comezan a despuntar outros sectores como o envellecemento activo.
A seguinte fase da Academia, na que participarán os 23 proxectos que saian seleccionados do Startup Day deste 19, desenvolverase durante 7 fins de semana para a súa validación e definición. O obxectivo desta nova etapa será facilitar os coñecementos, competencias e habilidades necesarias para definir o seu modelo de negocio a través dun programa práctico de pre-aceleración, enfocado á proposta de valor, a mellora e definición do modelo de negocio e a súa orientación ao mercado.
Unha vez finalizada a Academia, os mellores proxectos participarán no Demo Day de onde sairán un máximo de 15 propostas que se incorporarán en setembro á 8ª edición de ViaGalicia, que contou cunha participación inicial de 108 iniciativas.