As TIC póñense ao servizo da sanidade galega potenciando a telemedicina
luns, 31 de xaneiro do 2011
As novas
tecnoloxías, ademais de permitir a mellora da calidade asistencial no sistema
sanitario galego (a través do uso da receita electrónica ou da dixitalización
da historia clínica), permite agora cousas inimaxinables ata hai poucos anos e
que practicamente rondan a ciencia ficción: a consulta e diagnose de doenzas a
través de Internet.
Precisamente, a conselleira
de Sanidade, Pilar Farjas Abadía, destacou recentemente que a Administración
sanitaria galega está a implantar en todas as xerencias de Atención Primaria do
Servizo Galego de Saúde, diversos programas de potenciación da telemedicina
como a teleoftalmoloxía ou teledermatoloxía, entre outros, que se basean no uso
das TIC para o seu funcionamento.
No acto de
inauguración da 37 reunión anual da Sociedade Galega de Oftalmoloxía, Farjas
declarou que “Galicia non vai renunciar
ás novas tecnoloxías telemáticas, á telemedicina ou a aquilo que redunde nunha
atención máis rápida, mellor e máis segura para os pacientes”, e engadiu que
“esa é a nosa responsabilidade”.
O pulo da telemedicina experimentou un importante
incremento ao longo de 2010, con 4.120 consultas máis que en 2009. No caso
concreto da teleoftalmoloxía, actualmente, o número de centros de saúde con
solucións deste tipo implantadas ascende a 69 centros de saúde, fronte aos 29
centros de saúde que había a comezos da lexislatura.
A intención do Executivo é incrementar paseniñamente
estas ferramentas tecnolóxicas en centros de toda a Comunidade para o beneficio
de toda a sociedade galega.