As TIC, presentes no novo programa de formación e inserción laboral da Coruña

A Coruña quere avanzar na integración social de colectivos en risco. Para isto, o Servizo Municipal de Emprego e Empresa vén de pór en marcha o proxecto Coruña Suma, co-financiado polo Fondo Social Europeo, co obxectivo de “promover a capacitación profesional das persoas desempregadas con máis dificultades para a súa incorporación ao mercado de traballo”. A iniciativa de formación e adestramento abrangue apartados específicos de novas tecnoloxías.
Segundo fai saber o Concello, Coruña Suma é unha iniciativa integradora mesmo na metodoloxía empregada: unha metodoloxía que mobiliza a participación activa dos servizos sociais municipais así como das entidades comprometidas co Pacto Local polo Emprego (sindicatos, entidades do terceiro sector, entidades empresariais, representantes dos traballadores e traballadoras, entidades de economía social, universidade...), que desenvolven unha actividade complementaria da municipal.
O proxecto conta cun equipo de coordinación e tres equipos técnicos especializados na xestión de itinerarios integrados e personalizados de inserción, activación para o emprego e adestramento laboral.
Cada un destes equipos está formado por cinco profesionais de orientación e intermediación laboral, situados en diferentes barrios: Rosales-Labañou-Agra do Orzán, Sagrada Familia-Mallos e II fase de Elviña-Monelos-Barrio das Flores.
O plan é que nos vindeiros tres anos, a través dos 96 itinerarios do proxecto, se achegue formación a 1.440 persoas desempregadas e se consiga que polo menos 936 (o 65%) accedan a un posto de traballo (o 60% delas serán mulleres).
A través de Coruña Suma ofrécese formación con prácticas en empresas en sectores profesionais como: atención a persoas dependentes, comercio e mercadotecnia, deporte, administración, hostalería e turismo, industria alimentaria e informática-TIC (programación con Java, xestión comercial, etc).
O orzamento total deste proxecto é de 5.594.142,07 €, cun co-financiamento do Fondo Social Europeo do 80%, 4.475.313,66 € e unha achega municipal do 20%, que ascende a 1.118.828,41 €.