As axudas para a dixitalización das empresas turísticas oscilan entre os 300.000 euros e os 5 millóns
luns, 10 de xaneiro do 2022
As
empresas galegas turísticas teñen ao seu dispor importantes axudas
para acometer a súa transformación tecnolóxica, abordando procesos
de dixitalización tanto na súa actividade diaria como no que se
refire aos seus produtos. Así
o deu a coñecer este luns 10 de xaneiro o delegado do Goberno en
Galicia, José Miñones, quen animou ao sector a participar na
nova convocatoria de axudas á dixitalización do Ministerio de
Industria, Comercio e Turismo. Esta liña de axudas, que conta cun
orzamento de 25 millóns de euros, forma parte do Plan de
Recuperación, Transformación e Resiliencia do Goberno.
As
axudas, que oscilan entre os 300.000 e os 5 millóns de euros, están
destinadas a financiar proxectos de dixitalización en empresas do
sector turístico, como aqueles relacionados coa Internet das cousas,
a 5G, a xestión de datos a gran escala (Big Data), a
ciberseguridade ou as aplicacións móbiles, co “obxectivo de
mellorar os procesos de xestión das empresas na súa relación con
clientes, na xestión dos seus beneficios ou, por exemplo, no seu
posicionamento de marca”.
O
delegado do Goberno puxo en relevancia que “a dixitalización do
sector turístico é clave para seguir atraendo á nosa terra
visitantes que cada vez están máis hiperconectados e buscan
estadías de maior valor engadido”.
Esta
convocatoria enmárcase no plan de modernización e competitividade
do sector turístico que o Goberno está a financiar dentro do Plan
de Recuperación. Tal e como explicou José Miñones, “a finalidade
é contribuír a mellorar a competitividade do sector, e hoxe esta
competitividade ten moito que ver con desenvolver novas capacidades
dixitais que axuden ás empresas a atraer clientes e mellorar a súa
experiencia”.
O
prazo para poder solicitar estas axudas ficará aberto durante un mes
a partir da publicación da convocatoria no Boletín Oficial do
Estado.