As comunidades dixitais da cidade do Lérez teñen un novo espazo de participación: Pontevedra gHUB
venres, 2 de decembro do 2022
O
edil de Xuventude e Novas Tecnoloxías, Alberto
Oubiña, presentou esta semana o novo proxecto impulsado desde o
Concello e que leva por nome Pontevedra gHUB. Trátase,
dixo, dun punto de encontro para as comunidades dixitais que existen
na cidade, ou que parten da mesma.
“É
un proxecto no que levamos traballando desde hai máis dun ano e que
agora ve a luz ou, polo menos, conta xa cunha parte visíbel coa que
se pode interactuar”, explicou, engadindo que previamente houbo
durante meses un exhaustivo proceso de escoita para identificar todos
os axentes, ou a maior parte deles, que operan en Pontevedra no
ámbito dixital “e nas súas múltiples capas”. Respecto do nome
da iniciativa Oubiña fixo referencia ao significado orixinal da
palabra “hub”, e esa ampliación semántica e retranqueira ao
engadirlle o “g” diante, introducindo o noso factor “gheada”.
Ao
abeiro do proceso de desenvolvemento do Pontevedra
gHUB achouse xente do mundo dos videoxogos, como a asociación
Gaming Troop ou a Fundación Museo do Videoxogo de Galicia (MUVI) que
conta con representantes en Pontevedra; artistas especializados no
dixital, xente desde ESDEMGA no eido da moda, o deseño web e mesmo
influencers, creadoras de contido relacionado coa cidade ou
coas súas vidas. “Todas estas persoas forman a chamada comunidade
dixital pontevedresa que foi atopada nesta busca activa desde o
Concello”, sinalou o edil, aclararon que un dos obxectivos foi
“avanzar e afondar en dúas capas diferentes, dunha banda a capa
dixital, en base a unha web que estamos a crear e que está en
proceso de medrar; doutra banda, hai unha capa física na que as
persoas poderán atoparse, coñecerse e estreitar posíbeis lazos a
través dunha serie de encontros e un diálogo activo”.
Oubiña
tamén informou que un dos retos de gHUB Pontevedra é a
creación dun catálogo público, conectado a través da web, no que
as persoas da comunidade dixital poderán coñecerse e expoñerse,
tanto entre elas como ao público.
Afondando
na capa presencial, na capa física, o programa de encontros xa está
en funcionamento. Este 28 de novembro xa foi realizado un encontro
informal no Pazo da Cultura que tivo continuidade o este mércores 30
cunha charla da xornalista e directora de Vinte María Yáñez. Ás
17 horas tamén houbo unha sesión práctica.
Este
venres 2 de decembro, ás 19 horas, tamén está programada outra
cita con Marta Verde, artista visual e creadora dixital pontevedresa,
colaboradora na actuación das Tanxugueiras no Benidorm Fest, que
ofrecerá a súa experiencia na aplicación da arte dixital en
propostas ao vivo. O día 3, ás 10 horas, fará un obradoiro de
computer vision in comprocressing. Todas estas xuntanzas serán
realizadas na sala VIP do Pazo da Cultura.