As consolas Xbox Series X|S non subirán de prezo
venres, 26 de agosto do 2022
O
incremento do prezo das consolas PlayStation 5 en 50 euros de xeito oficial
creou grande preocupación entre os xogadores de todo do mundo, temerosos polo impacto
da inflación neste ámbito do lecer, o que levou a Windows Central a contactar
con Microsoft para consultar se as súas consolas replicarán o movemento das de
Sony, recibindo como resposta un comunicado no que aseguran
que non hai plans para incrementar o prezo das consolas Xbox Series X e Xbox
Series S, de xeito que os prezos de referencia en dólares, libras e euros
manteranse estables.
Esta información chega nun momento que parece clave para as Xbox Series X|S, xa
que parece que finalmente está normalizada a súa distribución en España, de
xeito que xa é posible a súa compra con certa normalidade tras un par de anos
nos que só era doado adquirir o modelo máis económico, a Xbox Series S, a un
prezo de 279 euros (e que está a ser todo un éxito en vendas).
A consola que era máis complicada de adquirir nos últimos anos, a Xbox Series
X, mantén o seu prezo de 499,99 euros, e non só está dispoñible na Microsoft
Store, senón que actualmente incluso pode mercarse en Amazon, destacando
o feito de que estamos a falar da venda de consolas soltas, e non de lotes con
varios produtos empaquetados, que está a ser a técnica que Sony emprega para
levar a súa PlayStation 5 ao mercado, de xeito que para facerse cunha consola
de Sony é habitual ter que rematar pagando no contorno dos 780 euros.