As consolas domésticas de Sony recibirán o ridículo Goat Simulator o mes que vén

mércores, 15 de xullo do 2015 Marcus Fernández

O primeiro de abril do ano pasado estrouse un dos videoxogos máis absurdos que se coñecen, o Goat Simulator, un proxecto que naceu como unha broma e que rematou converténdose nun xogo que ten a liberdade e o descontrol como máximos expoñentes, e que, tras a súa estrea en Windows (PC), deu logo o seu salto a OS X e Linux e incluso ousou a estrear o pasado mes de setembro versións para iOS e Android. Pero este proxecto de Coffee Stain Studios aínda ten corda para rato, e agora Sony confirma que o 11 de agosto lanzarán este título para PlayStation 3 e PlayStation 4.
O simulador de cabra que permite percorrer un mundo aberto desatando a destrución e incluso percorrer o amplo territorio mediante un jetpack, un á delta ou enganchándose a un helicóptero coa lingua, permite que o xogador poida facer estourar cousas, así como escornar calquera cousa, facer piruetas no aire e incluso gozar dun modo multi-xogador local para 2 usuarios en PS3 e 4 en PS4.
Como grande novidade, o xogo vai contar nas súas edicións para máquinas PlayStation dun modo chamado GoatVR, que sería unha simulación da realidade virtual que está tan de moda.

PUBLICIDADE