As criaturas de Spore convértense en figuras reais

Pese a ser unha das grandes decepcións do ano, Spore, continúa a dar que falar, non polas polémicas polo seu uso de protección DRM nin por ser o xogo para PC máis pirateado do ano, senón porque vai seguir os pasos de Rock Band, e vai permitir que as criaturas que deseñemos no xogo as poidamos imprimir en tres dimensións.
Dende Spore Sculptor podemos coller os personaxes creados durante o xogo e tras o pago de 49 dólares, podemos encargar unha réplica física, unha figura de pequeno tamaño creada con tecnoloxía de ZPrints, que nun principio se pensara para a creación de prototipos industriais, pero que atopou neste tipo de usos lúdicos unha saída comercial moi interesante, que cada vez parece máis ligada ao mundo dos videoxogos.