As galegas Cinfo e Quobis formarán parte do Pavillón de España en MWC Barcelona 2026

A entidade estatal Red.es fixo oficial a listaxe das 49 pemes tecnolóxicas que integrarán o Pavillón de España na próxima edición de MWC Barcelona, que se celebrará do 2 ao 5 de marzo de 2026 en Fira Gran Vía de Barcelona. As 49 pemes seleccionadas dispoñerán dun stand personalizado no Pavillón, onde mostrar os seus produtos e servizos, así como acceso a espazos destinados ao labor comercial, tales como unha área de networking e salas de reunións. En representación do puxante tecido produtivo galego (tecido TIC) estarán Quobis e Cinfo.
As empresas poderán participar nunha ampla axenda de actividades organizadas por Red.es no marco do Pavillón durante MWC Barcelona, entre as que destacan un extenso programa de conferencias, con mesas redondas e presentacións de relatoras de primeiro nivel, e un ambicioso calendario de networking con visitas de delegacións empresariais internacionais, sectoriais e institucionais, así como o afterwork e o cóctel oficial.
As empresas participantes tamén contarán cun nutrido catálogo de servizos para sacar o máximo aproveitamento á súa participación no Congreso, tales como un servizo de captación de leads e presenza en contidos promocionais, entre outros.
Na última edición, as empresas expositoras estimaron que a súa participación no Pavillón de España permitiría xerar un volume de negocio de 26,5 millóns de euros.
O Pavillón recibiu a máis de 13.000 visitantes presenciais, aos que se sumaron máis de 5.000 virtuais.
Acolleu máis de 70 actividades no set de conferencias, con relatoras de diferentes sectores que participaron en paneis, mesas redondas e reunións de networking, ademais de 60 entrevistas no set de podcast do Pavillón.
Por outra banda, entregouse por primeira vez o Premio Pavillón de España en MWC Barcelona, un galardón que cada ano destaca o labor dunha empresa expositora como motor da innovación e a transformación dixital en España, e que recaeu en Spika Tech pola “súa notable contribución ao valor público”.
MWC Barcelona, promovido por GSMA (Global Systems for Mobile Association), consolidouse como “o evento de referencia onde as principais empresas de alicerce dixital mostran as últimas innovacións relacionadas coa telefonía móbil e as comunicacións sen fíos, pero tamén con sectores tan innovadores como a intelixencia artificial, a realidade virtual e aumentada, a robótica ou todo tipo de software e hardware”.