As galegas TTT e IP Global desenvolverán unha plataforma de comunicación para o Clúster Español de Turismo de Saúde

venres, 27 de xuño do 2014 Fernando Sarasketa

JPEG - 115 KB
López Bourio durante a presentación compostelá de TTT Social Center

A axencia dixital TTT Social Center, con sede en Lugo e dirixida por José María López Bourio, vén de acadar un importante contrato para o desenvolvemento (co seu socio tecnolóxico coruñés IP Global, con David Bello á fronte) dunha plataforma de click to call de alcance internacional e co obxectivo de dar servizo a milleiros de usuarios. O proxecto, que recaeu en TTT e IP Global de mans do Clúster Español de Turismo de Saúde, implicará dar atención, soporte telefónico e información a “turistas sanitarios” dunha ducia de países, entre os que se contan Arabia Saudita, Emiratos do Golfo, Rusia, Alemaña, Suecia, Reino Unido, Noruega ou Finlandia, países interesados todos eles en recibir asistencia médica privada e servizos turísticos complementarios en España.
Por certo que o servizo a desenvolver polas empresas galegas materializarase a través da solución Webphone. Trátase dunha ferramenta que ten a función de conectar aos visitantes dunha web (os interesados) coas empresas de servizos, dende centros hospitalarios a residencias, pasando por hoteis, balnearios e axencias de viaxe. A solución opera sen custo para o cliente, e fai gala, informan TTT e IP Global, “dunha tecnoloxía madura, implantada e coñecida de abondo por todos os públicos, unha tecnoloxía que non é outra que o teléfono, tanto móbil como fixo, xerando un importante fluxo de datos”.
Segundo nos conta o propio José María López Bourio, este tipo de turismo é claramente unha actividade con moito potencial de proxección, e de feito calcúlase que medrará até os cincocentos millóns de euros en 2015. Asemade, recentes estudos de mercado feitos por Deloitte e a FNCP apuntan a que o volume total de negocio rexistrado polos países receptores de turistas sanitarios vai alén dos 7.400 millóns de dólares. De feito, en España o mercado actual rolda os 140 millóns de euros e espérase -como dixemos- que esta cifra creza até os 500 millóns de euros de aquí ao ano 2015.
Lanzado en 2013, o Clúster Español de Turismo de Saúde é un proxecto conxunto de cinco organizacións empresariais: a Federación Nacional de Clínicas Privadas (FNCP), a Asociación Nacional de Balnearios (ANBAL), a Federación Empresarial da Dependencia (FED), a Confederación Española de Hoteis e Aloxamentos Turísticos (CEHAT) e a Confederación Española de Axencias de Viaxes (CEAV). O obxectivo desta iniciativa é situar o Estado como “un referente no mercado do turismo sanitario e atraer fluxos de pacientes de alto poder adquisitivo cara aos centros sanitarios e infraestruturas turísticas membros do Clúster”. Segundo nos lembran fontes de TTT e IP Global, en Galicia súmanse a este proxecto “importantes clínicas privadas, hoteis e balnearios, aos que o Clúster ofrece interesantes perspectivas de negocio”.

PUBLICIDADE