As inspeccións agrarias intelixentes de Primare, ao detalle este martes en Forcarei
luns, 16 de setembro do 2019
Este
martes
17 de setembro vaise celebrar en Forcarei a primeira xornada Primare
Demo-Days, destinada a informar das posibilidades e desafíos do
proxecto galego Primare – Inspeccións Intelixentes Avanzadas, que
busca aplicar as tecnoloxías da Industria 4.0 ao noso agro mediante
a automatización dos controis en campo. A xornada vén da man da
axencia AMTEGA e a Consellería de Medio Rural. Segundo informan,
trátase do primeiro dos dous encontros previstos para mostrar
perante os responsábeis de explotacións as potencialidades que se
abren no agro con Primare, poñendo o foco nos beneficiarios das
axudas da Política Agraria Común (PAC).
O
programa inclúe, ademais, a presentación de vindeiras aplicacións
para que os agricultores se involucren “de forma activa” nos
procesos de inspección da PAC e tiren proveito de servizos de valor
engadido para facilitar a xestión das explotacións agrarias.
Así
mesmo, incorpórase unha actividade de campo para os que estean
interesados en coñecer o funcionamento do uso de medios aéreos non
tripulados (drons) para a captura e xestión de información
xeográfica, territorial e agroambiental xeorreferenciada das
explotacións.
No
mes de outubro está prevista unha segunda convocatoria da xornada
que terá lugar no concello de Meira (Lugo). A asistencia a calquera
das xornadas é gratuíta, previa inscrición a través da seguinte
ligazón:
https://mediorural.xunta.gal/primare_civil_uavs/presentacion/.
O
proxecto Primare - Inspeccións Intelixentes Avanzadas, co-liderado
pola Axencia para a Modernización Tecnolóxica de Galicia (AMTEGA) e
o Fondo Galego de Garantía Agraria (FOGGA), dependente da
Consellería do Medio Rural, ten por obxectivo “desenvolver
solucións innovadoras para dispoñer de servizos automatizados de
valor engadido para os axentes do sector agro-gandeiro, e en
particular, para a realización dos controis de campo asociados ás
axudas da Política Agraria Común (PAC) mediante medios tecnolóxicos
(en particular, mediante o uso de medios aéreos non tripulados, e
outros sistemas tecnolóxicos)”.
Trátase
do primeiro proxecto de compra pública de tecnoloxía innovadora
(CPTi) no ámbito do sector primario posto en marcha a nivel estatal,
que conta cun orzamento de 4M€ cofinanciado nun 80% con fondos
FEDER do Programa Operativo Plurirrexional de España 2014-2020
(POPE) procedentes do Convenio de Colaboración entre o Ministerio de
Ciencia, Innovación e Universidades, GAIN e a AMTEGA para o proxecto
CIVIL UAVs Initiative.