As lentes de Meta poden publicar directamente historias de Instagram

As lentes de Meta comercializadas en colaboración con Ray-Ban están a ter unha boa aceptación, de aí que estea a ampliarse a súa oferta de monturas progresivamente, así como a recepción de novas funcións.
Nas últimas semanas puidemos ver como este accesorio abría a posibilidade de facer uso da intelixencia artificial de Meta a través de voz ou incluso interpretando as imaxes captadas pola cámara das lentes (función que polo momento só funciona en inglés) e agora amplían as súas posibilidades incorporando a posibilidade de facer uso do servizo de streaming de música de Amazon sen ter que sacar o móbil do peto e tamén permiten publicar historias en Instagram directamente, pedíndolle ás lentes que saquen unha fotografía para publicala en Instagram ou pedíndolle que publique a última fotografía tomada.
Con este tipo de novidades está a quedar claro que dende Meta ven que ese é o camiño de integrar a tecnoloxía no día a día dos usuarios, que xa poden utilizar as lentes a xeito de mans libres para o móbil, como cámara fotográfica e de vídeo, para transmitir directos en Instagram en primeira persoa e incluso para videoconferencias a través de WhatsApp e Messenger.