As lentes de Meta reciben unha importante actualización

Meta pechou o ano cunha actualización significativa para as súas lentes de intelixencia artificial Ray-Ban Meta e Oakley Meta. Trátase da actualización de software v21, que incorpora dúas funcións destacadas: a capacidade de mellorar a audición en contornos ruidosos e unha integración pioneira con Spotify.
A primeira novidade, denominada Conversation Focus, permite amplificar a voz da persoa coa que se está a falar en lugares con moito ruído de fondo. Grazas aos altofalantes de oído aberto das lentes, o usuario pode distinguir mellor a conversa sen perder o contexto ambiental. O nivel de amplificación pódese axustar deslizando a patilla dereita das lentes ou a través da configuración do dispositivo, adaptándose así á intensidade sonora de cada situación.
A segunda innovación chega da man de Spotify e supón a primeira experiencia musical multimodal integrada nestes dispositivos. O usuario pode pedir a Meta AI que reproduza unha canción acorde ao que está vendo, sexa unha portada de disco ou unha escena festiva. A función combina visión por computador e recoñecemento de imaxes coa personalización de Spotify, xerando listas adaptadas ao gusto e ao momento.
Estas melloras están dispoñibles inicialmente para os participantes do programa de acceso anticipado en Estados Unidos e Canadá, con plans de expansión a outros mercados. A integración con Spotify, pola súa parte, xa se ofrece en inglés nunha serie de países entre os que está España.