As liñas móbiles de R quedan fóra de servizo dende o mediodía
venres, 23 de decembro do 2016
- Ante a saturación do servizo de atención telefónica de R as únicas canles efectivas nas que os usuarios puideron saber da incidencia foron as redes sociais
Dende
media mañá os
usuarios de liñas móbiles do operador R padeceron unha importante incidencia
que os deixou sen servizo de voz e datos, e para a súa desesperación, o servizo
telefónico de atención ao cliente atopábase saturado, polo que só podían
conseguir información sobre o acontecido a través da presenza da compañía nas
redes sociais, e ás
17:15 horas aseguraron ter identificado o motivo do fallo nos móbiles dos
seus clientes, e o inicio da recuperación progresiva das liñas, pero na práctica tal recuperación aínda non se completou pola noite, con problemas intermitentes no servizo de voz e datos xeneralizados, o que nas
datas actuais resulta especialmente molesto.
Ás 21:45 horas dende R insistiron nas desculpas polas molestias causadas, e aseguraron que estaban a recuperar as liñas a bo ritmo, mentres que os usuarios continúan a dar conta dos fallos no servizo, especialmente no que se refire a datos no móbil.
O malestar dos usuarios é evidente, pois veñen de ver como nos últimos meses experimentaron
unha suba na cota mensual das liñas móbiles e un cambio de cobertura móbil (de
Vodafone a Orange) que en moitos casos supuxo unha notable perda na calidade do
servizo (con bastantes queixar de usuarios que chegan incluso a perder a
cobertura móbil no seu fogar), e unha incidencia tan longa en datas sinaladas
non axuda a conservar a confianza nunha compañía que onte mesmo estreou novas
tarifas, o que pode facer que moitos clientes, postos a estudar a tarifa a
contratar, decidan mudar de compañía.
Dende R aseguran que unha vez resolta a incidencia procederán a analizar unha
posible compensación aos clientes afectados polo corte do servizo.
ACTUALIZACIÓN (24-12-2016): Ás 00:14 horas dende R afirman ter recuperado «o servizo de chamadas para todas as liñas» quedando pendente de «rematar o restablecemento do servizo de datos», ao que responden multitude de usuarios negando a maior, e asegurando que levan dende o mediodía sen liña e incluso pasadas as 1:00 horas aseguran que continúan sen servizo. Dende o operador insisten en que o servizo de datos restablecerase «durante a madrugada».