As microempresas galegas superan por vez primeira a media estatal en contratación de Internet
martes, 20 de outubro do 2020
A
pandemia non fixo máis que acelerar o proceso da dixitalización,
pero este xa se deixaba notar dende hai anos: o tecido produtivo
galego emprega cada vez máis as novas tecnoloxías da información.
Así nolo confirma este martes a enquisa sobre O uso das TIC e do
Comercio electrónico nas empresas 2019/2020 publicada polo
Instituto Nacional de Estatística (INE) e que vén de analizar o
Observatorio da Sociedade da Información e a Modernización de
Galicia (OSIMGA), adscrito á axencia AMTEGA. No estudo faise saber
que “as microempresas da nosa terra superan por vez primeira, cunha
taxa do 78,2%, a media estatal en contratación de Internet”.
En
concreto, reflíctese que a contratación de acceso á Rede entre as
microempresas galegas sitúase no 78,5%, experimentando un aumento
dun 7,9% no último ano, e superando amplamente o ritmo de crecemento
estatal (2,4%). No caso das empresas de 10 ou máis traballadores
Galicia practicamente converxe coa media estatal, acadando a práctica
totalidade deste segmento empresarial (98%).
Na
enquisa engádese que entre as tecnoloxías de acceso, o 67,5% das
microempresas e o 94,4% das de 10 ou máis traballadores contrataron
Internet a través de conexións fixas. As empresas de 10 ou máis
asalariados que se conectan á Rede a través deste tipo de conexións
ocupan a terceira posición no ranking de Comunidades
Autónomas e superan a media estatal en case 2 puntos.
No
que respecta á velocidade de conexión a Internet contratada, no
informe explícase que o 63,6% das empresas galegas de 10 ou máis
asalariados conta cunha velocidade superior aos 100 Mbps fronte ao
39,8% do ano anterior. “Isto representa un crecemento do 60% nas
conexións a Internet superiores aos 100 Mbps entre as empresas
galegas de 10 ou máis asalariados”, faise saber no estudo,
especificando que no capítulo de tipos de usos, salientan os
trámites coas administracións públicas: o 97,5% das empresas de 10
ou máis traballadores e o 73,8% das microempresas interactuou coas
Administracións Públicas a través de Internet.
Outro
dos datos refírese ás empresas galegas de 10 ou máis empregados,
que ocupan o segundo lugar na interacción coas administracións a
través de Internet e superan a media estatal en case 4 puntos. Tamén
se sitúan por riba da media na obtención de información das
administracións a través das webs, a descarga de formularios e na
devolución de formularios impresos.
O
INE tamén fai saber que o 9,2% das empresas galegas de 10 ou máis
traballadores analizou información a gran escala (Big
Data), dato superior á media estatal (8,5%), que
sitúa a Galicia no 5º lugar entre todas as comunidades.
Polo
que respecta ás empresas de 10 ou máis empregados con páxina web,
estas medraron un 3,8% ata chegar ao 80,9% e así superan por
primeira vez á media estatal (78,1%), que “se mantén estábel,
máis de 2 puntos por baixo das galegas”, reflicte AMTEGA,
engadindo que o 29,3% das microempresas galegas ten páxina web,
situándose tamén por riba da media estatal (28,8%).