As múltiples aplicacións das TIC na investigación histórica, polo miúdo estes días no Campus de Ourense

Finalmente estase a desenvolver, este xoves e venres, a segunda edición das Xornadas do Ciclo A Historia do Medio. Os encontros, que se celebran na Facultade de Historia de Ourense baixo o epígrafe A historia a través das novas tecnoloxías, achéganse como unha oportunidade inmellorable para coñecermos, de primeira man, o que podemos sacar de proveito das canles e servizos dixitais nas múltiples pólas do estudo do noso pasado. Por exemplo, a través de aplicacións para teléfonos móbiles sobre patrimonio, reconstrucións tridimensionais de pezas ou xacementos, bases de datos, análises de restos con espectrometría de masas e xeoradares, accións de divulgación nas redes sociais, creación de contidos audiovisuais, etc.
Este ciclo -organizado por Beatriz Comendador (decana da Facultade de Historia) xunto coa Delegación de Alumnos e da asociación de titulados e estudantes do centro Alehou- persegue polo tanto orientar e fomentar a adaptación dos perfís dos titulados ás demandas dos empregadores públicos e privados e complementar a formación dos estudantes fóra das aulas, con contidos de novo desenvolvemento e que aínda non están incorporados aos programas de ensino.
Segundo informa a Universidade de Vigo, da que depende o Campus de Ourense, as xornadas comezaron coa participación de Enrique Cerrillo, investigador do CSIC, e David Hernández, de Arbotante Patrimonio e Innovación, que falaron dunha ferramenta de clara proxección no eido da arqueoloxía. Trátase da fotogrametría, unha técnica que permite coñecer as propiedades xeométricas dos obxectos e dos espazos a partir de imaxes fotográficas. “Fronte ao custe do uso do láser escáner en 3D, esta técnica é moito máis barata porque se emprega unha cámara de fotos e software libre para facer o modelado tridimensional”, destacou David Hernández. Como exemplo da aplicación disto, Enrique Cerrillo amosou a réplica dixital realizada polo CSIC dunha paisaxe desaparecida: os dolmens de Alconétar, en Cáceres. Así, botando man de fotos aéreas e sistemas de información xeográfica, os investigadores fixeron unha reconstrución topográfica desta área, agora asolagada por un embalse. Segundo sinalou Cerrillo, “o interesante deste proxecto é que combina o uso de métodos tradicionais, como fontes escritas, cartografía histórica e imaxes antigas, con técnicas actuais, como a fotogrametría aérea, os sistemas de información xeográfica e os GPS, entre outros”.
A maiores da participación de Cerrillo e Hernández, está prevista ao longo das dúas xornadas deste ciclo a concorrencia en Ourense dun “amplo e multidisciplinar abano de profesionais procedentes tanto do eido público coma privado e de diferentes sectores”. Así, entre os participantes estarán a docente Anna Amorós, a xornalista Comba Campoy, a arqueóloga Alicia Colmenero, o enxeñeiro en telecomunicacións Martín López Nores, o creativo Xosé Teiga, o técnico do Cesga Emilio Abad e a directora da Otri da Universidade de Vigo, Ángeles López.