As múltiples vantaxes que poñen en xogo as probas de software, ao detalle nun curso de Vitae

martes, 21 de xaneiro do 2020 Fernando Sarasketa

As probas de software, dun tempo a esta parte, están a ocupar o lugar que merecen na categoría de tarefas primordiais para un bo desenvolvemento de programas: un lugar prioritario. As cousas non sempre foron doadas para esta parte fundamental do proceso, que é, nas ferramentas informáticas, a fase beta que non é visíbel e ao que normalmente non temos acceso os destinatarios das mesmas. Segundo nos conta a consultora Vitae, houbo un tempo (non moi afastado) en que as probas foron ignoradas e mesmo desprezadas por moitos. Porén, engade Vitae, “a industria do software de hoxe xa non acepta o negacionismo sobre a relación entre calidade e probas”. Para adestrarnos neste punto, a consultora convocou a segunda edición do Curso JS Testing: Probas útiles e rendíbeis.
A actividade, un obradoiro práctico para probar aplicacións web e JavaScript, é un taller de 10 horas de duración que se desenvolve os días 14 e 15 de febreiro na Coruña (Hotel Attica 21).
Respecto das razóns que están na orixe do curso, Vitae explica que a detección temperá de erros, a validación das funcionalidades e a mellora no deseño do código son as tres principais motivacións que permiten dicir de xeito rotundo: “As probas aforran diñeiro”.
No obradoiro, a consultora axudarnos a que coñezamos os fundamentos das técnicas máis comúns para que poidamos incluílos de contado no noso día a día e desta maneira mellorar a calidade dos nosos programas.
Estes son os obxectivos fundamentais do curso: coñecermos a terminoloxía e a filosofía dos distintos tipos de probas, comprobar funcionalidades con probas end to end de aplicacións web, refactorizar código legacy coa tranquilidade das probas unitarias e de integración, crear novo código baixo o paradigma Test Driven Development.
A actividade formativa está dirixida principalmente a programadores de aplicacións con experiencia e profesionais con coñecementos de tecnoloxía web (HTML e JavaScript).
O formador será Alberto Basalo, enxeñeiro técnico en Informática con dúas décadas de experiencia como analista programador, xefe de proxectos e formador en pequenas e grandes empresas. Basalo é, a día de hoxe, socio director de AgoraBinaria e consultor asociado a Vitae Consultores.

PUBLICIDADE