As novas tecnoloxías nas aulas e a defensa das nosas industrias culturais, piares do Foro Culturgal

As industrias creativas forman parte dos nosos principais motores de desenvolvemento económico e social. Este é un dos alicerces, practicamente unha chamada de atención para que as institucións responsables do seu coidado non deixen de apoialas, do Foro Culturgal 2012, un encontro de debate que chega á súa segunda edición tocando cuestións que nos collen ben de preto nesta web, como por exemplo as Ferramentas TIC e multimedia nas aulas, precisamente o título da xornada de difusión prevista para o sábado 1 de decembro, dentro do Foro e achegando charlas e obradoiros para profesionais do sector educativo.
Como dixemos, a segunda edición do Foro Culturgal quere facer visible unha cultura que “é moito máis que un conxunto de produtos ou servizos, un sector cultural que é moito máis que un sector económico”. Estamos a falar dunha parte importante da nosa identidade, a nosa marca e distintivo (imprescindible para termos mercado) e un eido de actividade que dá traballo e riqueza produtiva a mans cheas, beneficiando a tódolos sectores (transversabilidade). A cita (o Foro Culturgal) é os días 30 de novembro e 1 de decembro no Pazo da Cultura de Pontevedra e os dous eixos de traballo principais os seguintes:
O encontro Compartindo multiplicamos. Mesa de traballo para Axentes Culturais reunirá o venres 30 de novembro, de 10h a 18h, arredor de 10 mesas de traballo a 20 profesionais destacados do sector cultural de Galicia e do resto da Península, para que aborden xunto co resto dos asistentes temas clave como internacionalización, financiamento, recursos e programación e produción cultural e as súas vinculacións co contexto e coas comunidades. Algúns dos profesionais destacados que estarán na xornada do venres son Jordi Durán, director artístico de FiraTàrrega 2012; Cristina Salvador, directora de aPortada; Cristina Alonso, directora de Graner, ou Margarita Troguet, de Teatro L’’Escorxador de Lleida, entre outros moitos. Este encontro está impulsado pola Asociación Galega de Profesionais da Xestión Cultural.
A devandita xornada de difusión e formación Ferramentas TIC e multimedia nas aulas, unha visión práctica, achegaralles aos profesionais do sector educativo, o sábado 1 de decembro, de 10h a 19h, “unha serie de experiencias no uso práctico e real de ferramentas TIC e contidos multimedia pensados para as aulas”, informan os responsables do Foro. Entre os relatores e relatoras que achegarán os seus coñecementos e ideas estarán Manuel Area, catedrático de Tecnoloxía Educativa, que ofrecerá a visión máis positiva da incorporación das ferramentas TIC e os contidos multimedia nas aulas; Susana Vázquez, da Fundación Barrié, que achegará a súa experiencia no proxecto EducaBarrié como forma de contribuír á comunidade educativa; e varios mestres e mestras de infantil, primaria e secundaria. “A xornada”, engade o equipo de Culturgal, “fomentará o encontro entre mestres e profesionais das industrias culturais, para que aborden xuntos os retos aos que ambos colectivos se enfrontan á hora de fomentar a creatividade e a experimentación coas distintas disciplinas artísticas nas etapas formativas”. Os debates e charlas completaranse con varios obradoiros sobre proxectos que xa están en curso, para que os asistentes poidan tamén afondar nalgúns das iniciativas máis destacada e coñecer de cerca o seu proceso de creación. Os obradoiros desenvolveranse pola tarde.
O departamento de Ordenación, Innovación e Formación do Profesorado da Consellería de Educación e Cultura incluíu esta xornada dentro do Plan de Formación do Profesorado para o curso 2012/2013, polo que os mestres que se inscriban antes do 23 de novembro, a través da aplicación fprofe, recibirán un diploma acreditativo de 8 horas de formación.