As persoas maiores de 50 anos de Covelo recibiron formación en iniciación a Internet e eAdministración

venres, 3 de novembro do 2023 S. P.

As persoas maiores de 50 anos do concello de Covelo aprenderon cos profesionais de Redeia e CIBERVoluntarios.org a relacionarse electronicamente coas institucións públicas e navegar dun xeito seguro pola Rede grazas aos cursos gratuítos de iniciación a Internet e Administración Electrónica (eAdministración) que se impartiron na sala multiúsos do dito Concello pontevedrés.
Co obxectivo de acurtar a fenda dixital e durante dúas horas aprenderon conceptos básicos de iniciación a Internet, a realizar procuras de traballo na Rede, a redactar o seu currículo, a empregar o smartphone ou a tableta ou realizar compras a través do comercio electrónico. Ademais aprenderon pasos básicos para navegar con seguridade e a realización de trámites administrativos. Tamén puideron familiarizarse con ferramentas destinadas a mellorar a visibilidade dos negocios e a facer unha boa xestión das súas redes sociais.
Dende o Concello lembran que “o uso axeitado da Internet facilita o día a día das persoas sendo máis doado do que semella e posibilitando acceder a trámites, citas ou xestións coa administración dende a casa e a calquera hora do día”.

PUBLICIDADE