As vendas de portátiles poderían caer entre o 5,4% e o 10,1% en 2026

Segundo as últimas estimacións de TrendForce, o volume global de envíos de ordenadores portátiles situarase arredor dos 173 millóns de unidades, o que supón unha caída interanual do 5,4 %. A revisión á baixa responde a un contexto de recuperación económica débil, cun consumo contido e cun forte incremento dos prezos da memoria, que está a reducir de maneira significativa as marxes das marcas e a súa capacidade para axustar prezos.
Este escenario está a levar aos fabricantes a adoptar unha estratexia máis conservadora en materia de xestión de inventarios, campañas promocionais e configuracións de produto. TrendForce advirte de que, se o encarecemento da memoria non se modera de forma clara a partir do segundo trimestre de 2026 e as marcas non conseguen trasladar ese sobrecusto ao consumidor final, a demanda de portátiles de gama de entrada e de consumo podería resentirse aínda máis. Nese caso, a caída anual podería achegarse ao 10,1 %.
O informe subliña que a resistencia das marcas depende en gran medida da súa relación coa cadea de subministración, do equilibrio da súa oferta de produtos, das estratexias de canle e da fortaleza da demanda empresarial. As compañías con acordos estables a longo prazo cos grandes provedores de memoria, cun maior peso dos equipos profesionais e de gama media-alta e cunha xestión madura de prezos e distribución están mellor posicionadas para absorber o impacto dos custos crecentes.
Un dos fabricantes que podería verse menos afectados pola situación é Apple, xa que a integración da súa cadea de subministración e o seu poder de fixación de prezos permítenlle unha maior flexibilidade á hora de axustar o catálogo. Ademais, os seus volumes de compra constantes, un calendario de lanzamentos definido e unha planificación da demanda moi previsible facilitan a prioridade nas relacións cos provedores de memoria. A compañía de Cupertino prevé lanzar na primavera de 2026 un modelo de 12,9 polgadas orientado á franxa de entrada e gama media, que podería contribuír a resistir a tendencia baixista do mercado.
Pola súa banda, Lenovo, líder mundial en volume de portátiles, tamén se beneficia do tamaño e da solidez da súa cadea de subministración. TrendForce sinala que as subas dos prezos recomendados poderían ser inevitables, pero a capacidade de negociación e a escala do grupo poderían limitar ese incremento e darlle marxe para gañar cota de mercado nun entorno adverso.
O impacto do encarecemento da memoria tamén se deixará sentir noutros compoñentes clave. TrendForce estima que a demanda total de paneis para portátiles caerá un 7,9 % interanual en 2026. Os paneis LCD serán os máis afectados, pola combinación dunha menor demanda global e a crecente adopción da tecnoloxía OLED. Aínda que os paneis OLED seguirán medrando grazas á ampliación da oferta de modelos compatibles, o aumento dos custos (que previsiblemente se trasladará aos prezos finais) podería frear o ritmo de crecemento dos envíos durante o próximo ano.