As xornadas Galicia Innovation Days de FEUGA rexistran xa participantes de máis de trinta países
mércores, 13 de outubro do 2021
As
xornadas
Galicia Innovation Days que impulsa FEUGA están a
espertar o interese de investigadores, universidades, empresas e
centros tecnolóxicos de catro continentes. O evento, organizado pola
Xunta e a dita fundación universitaria-empresarial co obxectivo de
visualizar as oportunidades de financiamento que se abren coas novas
convocatorias do programa Horizonte Europa, celebraranse do 25 ao 29
de outubro. A día de hoxe supéranse xa rexistra participantes de
máis de 30 países de todo o mundo.
Bélxica,
Italia, Francia e Grecia son, tras España, os países con maior
presencia no evento que se celebrará en formato en liña e con
carácter gratuíto.
Segundo
explican fontes de FEUGA, o interese por coñecer as novas
posibilidades de financiamento para a I+D+i “traspasa o continente
europeo e chega a países como Singapura, India, Ghana, Turquía,
Perú, México, Venezuela, Chile ou Guadalupe, entre outros”.
As
xornadas Galicia Innovation Days contarán con expertos
internacionais que abordarán os distintos clústeres do programa
Horizonte Europa para responder así aos retos de futuro aos que se
enfronta a nosa sociedade e o papel que xogan a innovación e a
investigación.
A
organización engade que ao abeiro do extenso programa que acompaña
ao evento, as áreas sobre medio ambiente, dixitalización e
alimentación son as que concitaron, até o de agora, un meirande
interese, seguidos das temáticas relacionadas coa industria, a
enerxía e o clima.
Gerd
Schönwälder, policy officer para a
Transición Ecolóxica e Social da Comisión Europea, Garbiñe Guiu
Etxeberria, directora xeral de Investigación e Innovación -
Transformacións Industriais da Comisión Europea, e Inge Van Oost,
policy officer e directora xeral de
Agricultura e Desenvolvemento Rural da Comisión Europea, son o tres
relatores destacados do evento até a data, a falta das últimas
confirmacións.
Reunións
individuais para buscar novos socios
Dende
FEUGA lembran que un dos obxectivos de Galicia Innovation Days
é “o fomento do networking entre posíbeis socios e
colaboradores”. Seguindo este fío e “para facilitar a creación
desa rede de contactos” os asistentes poderán realizar intercambio
de mensaxes e reunións individuais durante as catro xornadas a
través da plataforma b2match. O prazo de rexistro ficará aberto
até o 29 de outubro. “Os asistentes poderán pendurar nunha
plataforma o seu perfil, os seus intereses, solicitar reunións e ver
oportunidades de colaboración en materia de I+D+i, en materia
comercial e para a solicitude de fondos de financiamento europeo”,
explica a directora de Innovación e Programas Europeos de FEUGA,
Almudena Justo.
Un
impulso á investigación e a innovación
O
impulso á investigación e á innovación é unha das liñas
estratéxicas de FEUGA que conta cunha área de programas europeos
dirixido por Almudena Justo. A Fundación Universidade Empresa
Galega, cun equipo multidisciplinar de expertos en international
business e representación en Bruxelas, eríxese como axente para
facilitar as negociacións entre empresas, investigadores e axentes
públicos, representando os intereses de distintos colectivos. “No
noso equipo somos expertos en transferencia tecnolóxica e de
coñecemento. O noso obxectivo é que os resultados de investigación
cheguen ao destinatario final, cheguen á cidadanía, cheguen á
industria. Para este traballo temos un equipo multidisciplinar
formado por equipos técnicos con especialización en distintas áreas
tecnolóxicas e con grandes habilidades de negociación para a
consecución de fondos europeos que apoien a I+D+i e que respalden
esa transferencia tecnolóxica. En liña con este traballo
desenvolverase o evento Galicia Innovation Days”, destaca
Almudena Justo.
As
xornadas permitirán mostrar as capacidades de Galicia en
investigación e innovación, así como informar os participantes das
novas convocatorias de Horizonte Europa, o novo programa de
financiamento europeo de I+D+i e que conta cun orzamento de 95.000
millóns de euros para o período 2021-2027.