Asphalt Extreme chega a iOS, Android e Windows

Nos últimos anos a franquía de xogos de condución Asphalt foi gañando peso entre os dispositivos móbiles, pero dende hai varias versións estes lanzamentos chegan máis aló e tamén están dispoñibles a través da tenda de aplicacións de Windows, de xeito que tamén é posible gozar destes títulos en ordenadores persoais, chegando así a un público moi amplo. O último xogo desta serie é Asphalt Extreme, que xa podemos descargar de balde da App Store, Google Play e a tenda de Windows, e ofrece a posibilidade de competir a catro rodas a través de territorios inexplorados contando con 35 máquinas monstrosas personalizables de 7 tipos diferentes (con matices de seu) e incluso de marcas importantes.
Asphalt Extreme permite enfrontar até a 8 xogadores en liña en tempo real, conta con 5 modos de xogo, máis de 400 eventos en modo historia, máis de 500 desafíos de mestría, eventos de tempo limitado e moitas outras novidades que procurarán manter este xogo vivo e así tamén animar aos xogadores a pasar por caixa (xa que estamos ante un xogo con compras integradas dentro da aplicación).