Astroplant mergulla á rapazada nas tecnoloxías aeroespaciais dende o Campus de Ferrol
martes, 26 de outubro do 2021
O
Campus de Ferrol consolídase cada ano como un sobranceiro foco de
divulgación tecnolóxica ao servizo das novas xeracións STEM
(acrónimo de Ciencia, Tecnoloxía, Enxeñaría e Matemática). Por
exemplo a través do proxecto educativo Astroplant liderado pola
Asociación Áurega con sede en Narón, ao que se achegan máis
de 80 nenas e nenos de idades comprendidas (entre os 5 e os 16 anos)
cada dúas semanas. Segundo informa a UDC, as sesións celébranse no
Edificio de Apoio ao Estudo do Campus Industrial de Ferrol, en
colaboración coa Academia Gazapo e Miguel Riola de Araiva.
Divididos
en pequenos grupos, as rapazas e rapaces traballan cun kit
tecnolóxico facilitado pola Axencia Espacial Europea (ESA) que lles
permite explorar as posibilidades de autoabastecemento de vexetais
para dotar de soporte vital aos astronautas en futuras misións
espaciais interplanetarias.
Deste
xeito, ao longo do curso 2021/22, as e os participantes traballarán
cun kit tecnolóxico onde as plantas medran nunha contorna controlada
por un ordenador simulando as condicións que experimentarían nunha
futura colonia extraterrestre.
Tal
e como indican desde a Asociación Áurega, durante todo este
período, as crianzas participantes “aprenderán a traballar en
equipo, a identificar e a resolver problemas, a interpretar planos e
esquemas, a empregar distintas ferramentas informáticas, a realizar
experimentos protocolizados e a interiorizar conceptos básicos de
electrónica”.
A
maiores, o Salón de Actos Concepción Arenal do Campus Industrial de
Ferrol acollerá tamén, dous sábados ao mes, as sesións impartidas
pola psicóloga Andrea Bechlian no marco da Escola de Familia que
promove a Asociación Áurega e na que participan os pais e nais
destes nenos e nenas con altas capacidades.